Temperaturat mbeten të larta në Zvicër gjatë dimrit 2025–2026

@pixabay

Temperaturat në Zvicër kanë qenë sërish veçanërisht të larta gjatë dimrit të fundit, sipas të dhënave nga MeteoSwiss.

Sipas këtij institucioni, temperatura mesatare gjatë dimrit meteorologjik (dhjetor 2025 dhe janar–shkurt 2026) ka qenë -0.2°C, që është 1.6°C më e lartë se mesatarja e periudhës referuese 1991–2020. Ky dimër renditet si i gjashti më i ngrohtë që nga fillimi i matjeve në vitin 1864, transmeton albinfo.ch.

Shkurti 2026, ndër më të ngrohtit në histori

Gjatë muajve dhjetor dhe janar, temperaturat në zonat malore ishin më të buta se mesatarja afatgjatë. Ndërkohë, në shkurt temperaturat tejkaluan mesataren në të gjithë vendin.

Edhe pse pas dy muajsh me reshje të pakta, në rajonet frankofone, në Valais dhe në shpatet veriore të Alpeve pati reshje të konsiderueshme bore gjatë shkurtit, ky muaj mbeti sërish jashtëzakonisht i ngrohtë.

Shkurti 2026 renditet si muaji i pestë më i ngrohtë i regjistruar ndonjëherë, me një temperaturë mesatare 3.2°C mbi normën referuese.

Rritje e ndjeshme e temperaturave ndër vite

Të dhënat tregojnë një trend të qartë ngrohjeje: temperatura mesatare e muajit shkurt është rritur nga 1.4°C në 5.1°C gjatë 140 viteve të fundit. Kjo konfirmon ndikimin në rritje të ndryshimeve klimatike, ndërsa ekspertët paralajmërojnë për pasoja të vazhdueshme në vitet e ardhshme.