Tragjedia në Chiètres: I dyshuari për zjarrin në autobusin postar ishte raportuar i zhdukur nga spitali

Personi që dyshohet se shkaktoi zjarrin tragjik në një autobus postar në qendër të Chiètres, në kantonin e Fribourgut, ishte raportuar më herët si i zhdukur nga një spital në kantonin e Bernës.

Sipas policisë kantonale të Bernës, alarmi për zhdukjen e tij u dha të martën pak pas orës 13:00. Menjëherë u nisën hetime dhe operacione kërkimi, ndërsa patrulla të shumta dhe shërbime të tjera u angazhuan për ta gjetur personin. Megjithatë, pavarësisht përpjekjeve, ai nuk u lokalizua dhe nuk pati të dhëna konkrete për vendndodhjen e tij.

Autoritetet bënë të ditur se bëhet fjalë për një shtetas zviceran rreth të gjashtëdhjetave, i cili ishte nën trajtim mjekësor dhe kishte probleme të njohura të shëndetit mendor. Ai ishte gjithashtu i regjistruar në sistemin kombëtar të kërkimit Ripol.

Sipas informacioneve të konfirmuara nga Prokurori i Përgjithshëm i Fribourgut, Raphaël Bourquin, dyshohet se burri i ka vënë zjarrin vetes brenda autobusit postar, duke shkaktuar incidentin tragjik në qendër të qytetit.

Pavarësisht kërkimeve të policisë, autoritetet theksuan se deri të martën nuk kishte indikacione konkrete që ai mund të paraqiste rrezik për të tjerët apo për veten.