Komuna e Prishtinës shton linjat e autobusëve drejt Aeroportit për shkak të ndeshjes Kosovë – Turqi

Më 31 mars dhe 1 prill do të ketë nisje çdo një orë në linjën 1A Aeroport – Prishtinë, nga ora 06:00 deri në 24:00, për të përballuar fluksin e shtuar të qytetarëve.

Komuna e Prishtinës ka njoftuar se, me rastin e zhvillimit të ndeshjes Kosovë – Turqi dhe rritjes së ndjeshme të kërkesës për qarkullim, do të shtohen nisjet në transportin publik drejt Aeroportit Ndërkombëtar të Prishtinës, përcjell albinfo.ch.

Sipas njoftimit zyrtar, në bashkëpunim me Trafikun Urban, më 31 mars dhe 1 prill do të ketë më shumë nisje në linjën 1A Aeroport – Prishtinë dhe anasjelltas.

Komuna ka bërë të ditur se autobusët do të qarkullojnë çdo një orë, nga ora 06:00 deri në 24:00, duke u nisur nga Aeroporti Ndërkombëtar i Prishtinës “Adem Jashari” dhe nga Stacioni i Autobusëve në Prishtinë.

Ky vendim është marrë me qëllim të lehtësimit të qarkullimit dhe të përballimit të fluksit të shtuar të qytetarëve gjatë këtyre dy ditëve, i cili pritet të rritet për shkak të ndeshjes Kosovë – Turqi./Albinfo.ch

---