Mërgata nga Zvicra mbështet studentët e UP-së me bursa mujore

Përfaqësues të Fondacionit “Vildana”, i themeluar nga diaspora kosovare në Zvicër, kanë vizituar Universitetin e Prishtinës, së bashku me disa studentë përfitues të bursave nga ky fondacion.

Gjatë një takimi me drejtuesit e universitetit, koordinatori i fondacionit për Kosovë, Maqedoni të Veriut dhe Shqipëri, Labinot Kunushevci, bëri të ditur se që nga themelimi në vitin 2021, Fondacioni “Vildana” ka ndarë gjithsej 50 bursa për studentë shqiptarë, prej të cilave 40 janë për studentë të UP-së.

Sipas tij, veçantia e këtyre bursave qëndron në faktin se ato ndahen në baza mujore dhe vazhdojnë deri në përfundimin e studimeve, duke përfshirë nivelet bachelor dhe master, njofton Universiteti i Prishtinës.

Përfituesit e bursave nuk duhet të jenë përfitues të ndonjë burse tjetër, ndërsa përparësi në përzgjedhje kanë studentët nga familje me më shumë studentë, ata që janë pa njërin prind, si dhe ata që ndjekin programe studimi me kosto më të lartë. Thirrja për aplikim publikohet çdo vit në muajin shtator, para fillimit të vitit akademik.

Kunushevci theksoi se diaspora shqiptare beson në potencialin e studentëve të UP-së, duke e cilësuar investimin në arsim si ndër më të sigurit.

Delegacioni i fondacionit, së bashku me studentët përfitues Shkumbin Haxha, Elza Nuredini, Anika Fonda, Zana Morina dhe Art Gjuli, u prit nga rektori Arben Hajrullahu dhe prorektorja Albana Berisha-Qehaja.

Fondacioni “Vildana” është themeluar për të nderuar kujtimin e një gruaje kosovare me të njëjtin emër, e cila jetoi dhe veproi në Zvicër. Përveç familjes së saj, fondacioni mbështetet edhe nga kontributet e mërgatës shqiptare.