Kosovë: Paralajmërohen gjoba ndaj KEDS pasi rezultoi se përdori njehsorë me afat të skaduar

Ministria e Industrisë, Ndërmarrësisë, Tregtisë dhe Inovacionit (MINTI) në Kosovë ka njoftuar të enjten se testimet laboratorike në Agjencinë e Metrologjisë kanë zbuluar devijime në kohë dhe datë të disa njehsorëve të energjisë elektrike, megjithëse matjet e energjisë kanë rezultuar të sakta dhe bllombat e pajisjeve të paprekura.

Bazuar në këto gjetje, MINTI do të kërkojë nga Zyra e Rregullatorit të Energjisë (ZRRE) që të ndërmarrë masat e nevojshme për korrigjimin e devijimeve. Ndërkohë, Inspektorati Qendror i Mbikëqyrjes së Tregut (IQMT) pritet të shqiptojë gjoba ndaj KEDS-it për përdorimin e njehsorëve me afat të skaduar, sipas ligjit në fuqi.

Që nga krijimi i komisionit verifikues, vetëm në dy ditët e fundit janë regjistruar 209 ankesa, ndërsa më parë Departamenti për Mbrojtjen e Konsumatorit nuk kishte pranuar ankesa të ngjashme.

Gjetjet kryesore nga verifikimi:

Njehsorët ishin me afat të skaduar të vlefshmërisë;

Devijime në datë rreth 2–3 ditë dhe në kohë rreth 10–11 orë;

Matja e energjisë elektrike ishte e saktë;

Bllombat e njehsorëve nuk ishin dëmtuar.

MINTI thekson se do të vazhdojë të trajtojë çdo ankesë të konsumatorëve dhe do të marrë masa ligjore në përputhje me gjetjet e veri1fikimit.