Islamabad: Fillojnë bisedimet SHBA-Iran

Keystone EPA/ABEDIN TAHERKENAREH

Në Islamabad, Pakistan, kanë nisur bisedimet mes negociatorëve të Shteteve të Bashkuara të Amerikës dhe Iranit.

Deri më tani, nuk ka raportime nëse takimet janë ballë për ballë apo nëse ekipet e SHBA-së dhe Iranit janë në vende të ndara dhe ndërmjetësit pakistanezë këmbejnë mesazhet mes palëve.

Delegacioni amerikan përfshin të dërguarit e posaçëm, Steve Witkoff, dhe Jared Kushner, si dhe zyrtarë nga Këshilli i Sigurisë Kombëtare, Departamenti i Shtetit dhe Pentagoni, të cilët kanë përballë ekipin iranian të udhëhequr nga ministri i Jashtëm Abbas Araqchi dhe kryetari i Parlamentit Mohammad Baqer Qalibaf.

Më herët gjatë ditës, kryeministri pakistanez, Shehbaz Sharif, zhvilloi bisedime të ndara me nënpresidentin amerikan, JD Vance, në Islamabad, pasi paraprakisht takoi edhe delegacionin iranian, duke nisur kështu përpjekjet diplomatike për t’i dhënë fund konfliktit të Shteteve të Bashkuara dhe Izraelit me Iranin.

Ndryshe, bisedimet e ditës së sotme pritet se mund të përcaktojnë përfundimisht nëse armëpushimi i brishtë dyjavor do të respektohet, transmeton albinfo.ch.