Kaos në aeroportet evropiane pas hyrjes në fuqi të sistemit të ri kufitar të BE-së

Keystone EPA/ALEJANDRO GARCIA

Sistemi i ri i kontrollit kufitar të Bashkimit Evropian, Entry/Exit System (EES), ka shkaktuar probleme të mëdha në disa aeroporte evropiane, duke sjellë vonesa, radhë të gjata dhe anulime fluturimesh për mijëra udhëtarë nga vendet jashtë BE-së.

Sistemi kërkon regjistrim biometrik për të gjithë pasagjerët që hyjnë ose dalin nga zona Shengen, përfshirë edhe Mbretërinë e Bashkuar, ku merren shenjat e gishtërinjve dhe fotografia e fytyrës.

Probleme janë raportuar në aeroporte të ndryshme si Gjeneva, Lisbona dhe Malta, ndërsa situata e vështirë është shënuar edhe në Bruksel dhe Amsterdam. Në disa raste, pritjet në kontrollin e pasaportave kanë zgjatur deri në dy orë.

Në disa aeroporte janë krijuar skena të mbipopulluara, ku familje me fëmijë dhe persona të moshuar kanë pritur me orë të tëra, ndërsa disa sisteme automatike nuk kanë funksionuar siç duhet.

Situata është përkeqësuar edhe në Milano, ku disa pasagjerë kanë raportuar se nga pritjet e gjata disa persona janë ndjerë keq dhe kanë humbur ndjenjat pas orësh në radhë.

Po ashtu, rreth 100 pasagjerë të kompanisë easyJet kanë mbetur në aeroportin e Milanos Linate pasi nuk arritën të kalonin në kohë kontrollin kufitar, duke bërë që fluturimi drejt Mançesterit të nisej pa ta.

Kompania ajrore e ka cilësuar situatën si jashtë kontrollit të saj, ndërsa drejtuesi i Ryanair e ka quajtur zbatimin e sistemit “kaos” dhe “çrregullim”, duke akuzuar Bashkimin Evropian për krijimin e vështirësive për udhëtarët britanikë pas Brexit-it.

EES, që zëvendëson vulosjen tradicionale të pasaportave, mbledh të dhëna biometrike për qytetarët jashtë BE-së dhe ka nisur të zbatohet gradualisht nga tetori 2025, me plan për zbatim të plotë në prill 2026.

Autoritetet u bëjnë thirrje udhëtarëve të paraqiten më herët në aeroporte, për shkak të pritjeve të gjata që po shkakton sistemi i ri.