Kaos në aeroportet evropiane nga sistemi i ri kufitar, radhë të gjata dhe vonesa për mijëra udhëtarë

Zbatimi i sistemit Entry/Exit System (EES) ka shkaktuar pritje deri në dy orë në disa aeroporte, veçanërisht për udhëtarët jashtë BE-së

Mijëra udhëtarë jashtë Bashkimit Evropian po përballen me radhë të gjata, vonesa të mëdha dhe në disa raste edhe anulime fluturimesh në shumë aeroporte evropiane, si pasojë e zbatimit të sistemit të ri kufitar Entry/Exit System (EES) të Bashkimit Evropian, transmeton albinfo.ch.

Sistemi i ri parasheh që udhëtarët nga vendet jashtë zonës Shengen, përfshirë edhe Mbretërinë e Bashkuar, të regjistrohen përmes të dhënave biometrike gjatë hyrjes dhe daljes nga territori i BE-së. Kjo përfshin gjurmët e gishtërinjve dhe fotografimin e fytyrës, procedurë që po zgjat kohën e kontrollit në pikat kufitare.

Gjatë fundjavës janë raportuar radhë të gjata dhe vonesa në disa nga aeroportet kryesore evropiane, përfshirë Gjenevën, Lisbonën dhe Maltën, ndërsa probleme janë shënuar edhe në Bruksel dhe në disa aeroporte të Holandës.

Sipas raportimeve, situata ka vazhduar edhe në ditët në vijim, me udhëtarë në aeroportin e Brukselitdhe në Schiphol të Amsterdamit që kanë raportuar pritje deri në dy orë vetëm në kontrollin e pasaportave.

Zbatimi i këtij sistemi është pjesë e përpjekjeve të BE-së për të forcuar sigurinë dhe për të kontrolluar më saktë hyrjet dhe daljet e qytetarëve nga vendet e treta, por në ditët e para të implementimit, ai po krijon ngarkesë të konsiderueshme dhe shqetësime për udhëtarët në të gjithë Evropën./Albinfo.ch

---