Sistemi i ri Tardoc: Specialistët po rrisin numrin e vizitave për të kompensuar të ardhurat

(KEYSTONE/Christian Beutler)

Sistemi i ri i tarifimit të shërbimeve shëndetësore në Zvicër, Tardoc, i hyrë në fuqi në janar 2026, po shkakton reagime dhe pasoja për pacientët. Disa mjekë specialistë po planifikojnë më shumë vizita për të njëjtin trajtim, me qëllim kompensimin e humbjeve financiare nga rregullat e reja.

Ndryshimet lidhen kryesisht me sistemin e tarifave fikse, i cili nuk lejon faturimin e disa ndërhyrjeve të kryera në të njëjtën ditë. Si pasojë, trajtimet po ndahen në disa takime të veçanta, duke detyruar pacientët të paraqiten më shpesh.

Përfaqësues të mjekëve thonë se kjo është pasojë e drejtpërdrejtë e rregullave të Tardoc, ndërsa kritikët e konsiderojnë praktikën të padrejtë dhe potencialisht abuzive. Senatori Baptiste Hurni e ka cilësuar këtë fenomen si “skandaloz”, duke paralajmëruar edhe pasoja ligjore në rast të përdorimit sistematik.

Shoqata e siguruesve shëndetësorë thekson se ndarja e trajtimeve në disa ditë lejohet vetëm kur ka arsye mjekësore, ndërsa shërbimet duhet të jenë ekonomikisht të justifikueshme.