Pse viti 2026 është një vit i favorshëm për pensionistët në Zvicër

Rritja e fitimeve nga fondet e pensioneve dhe interesat më të larta për kursimet e sigurimeve pritet të përfitojnë edhe punëtorët e huaj që kanë kontribuar në sistemin zviceran.

Viti 2026 pritet të sjellë lajme pozitive për pensionistët në Zvicra, falë performancës së mirë të fondeve të pensioneve gjatë vitit 2025. Investimet e suksesshme në tregjet financiare kanë rritur ndjeshëm kapitalin e sistemit të pensioneve, veçanërisht të shtyllës së dytë të pensioneve profesionale, transmeton albinfo.ch.

Sipas të dhënave të High Supervisory Commission for Occupational Pensions (SCOP), fondet e pensioneve në Zvicër arritën në vitin 2025 një normë mesatare mbulimi prej 117.1 për qind, krahasuar me 114.7 për qind në vitin paraprak. Kjo rritje do të reflektohet drejtpërdrejt tek të siguruarit, të cilët në vitin 2026 do të përfitojnë nga një normë mesatare interesi prej rreth 4.33 për qind mbi kursimet e tyre pensionale.

Kjo do të thotë se përfitime do të kenë edhe punëtorët e huaj që kanë kontribuar në sistemin e pensioneve gjatë kohës që kanë punuar në Zvicër, pasi fondet e grumbulluara investohen në tregjet e kapitalit për të gjeneruar fitime, interesa të përbëra dhe dividentë.

Megjithëse viti 2025 u karakterizua nga pasiguri ekonomike dhe tensione gjeopolitike që shkaktuan luhatje në tregjet financiare, autoritetet theksojnë se shumica e institucioneve të pensioneve janë të përgatitura mirë për të përballuar periudha të vështira falë rezervave të tyre financiare.

Sistemi i pensioneve me tre shtylla

Sistemi i pensioneve në Zvicra bazohet në tre shtylla kryesore:

Shtylla e parë – pensioni shtetëror i njohur si AHV/AVS, i detyrueshëm për të gjithë të punësuarit dhe të vetëpunësuarit.
Shtylla e dytë – pensioni profesional që lidhet me vendin e punës.
Shtylla e tretë – kursime private për pension, që janë plotësisht vullnetare.

Punonjësit, pavarësisht kombësisë, duhet të kontribuojnë në shtyllën e dytë nëse janë të paktën 17 vjeç, kontribuojnë në pensionin shtetëror dhe fitojnë të paktën 22,680 franga në vit nga një punë e rregullt.

Lajm tjetër i mirë për pensionistët

Një tjetër zhvillim pozitiv pritet të hyjë në fuqi në fund të vitit 2026. Pas një vendimi të miratuar në referendum në vitin 2024, pensionistët në Zvicra do të marrin edhe një pagesë të 13-të të pensionit shtetëror, duke filluar nga dhjetori 2026.

Kjo pagesë shtesë do të jetë në të njëjtën vlerë me pensionin mujor të zakonshëm, duke rritur kështu të ardhurat vjetore për shumë pensionistë në vend. /Albinfo.ch

---