Edi Rama bën thirrje për votim në Eurovision: “Votoni 13 për Shqipërinë”

Kryeministri kërkon mbështetje për artistin Alis me këngën “Nan”, i cili garon sonte në gjysmëfinalen e dytë në Vjenë

Kryeministri i Shqipërisë, Edi Rama, ka bërë një thirrje publike për mbështetjen e përfaqësuesit shqiptar në Eurovision 2026, artistit Alis, i cili do të performojë mbrëmjen e sotme në Vjenë, në kuadër të gjysmëfinales së dytë të këtij kompeticioni të madh evropian, përcjell albinfo.ch.

Në një mesazh drejtuar qytetarëve shqiptarë jashtë vendit, Rama ka inkurajuar publikun që të votojë për Shqipërinë duke dërguar votën me numrin 13, duke theksuar rëndësinë e përkrahjes së artistit shqiptar në një skenë ndërkombëtare.

“Le të mbështesim artistin dhe përfaqësuesin tonë në Eurovision, Alis, dhe ta bëjmë zërin shqiptar të dëgjohet në gjithë Europën dhe më gjerë,” ka shkruar Rama.

Thirrja e tij shoqërohet me apel për mobilizim të diasporës dhe publikut jashtë Shqipërisë, pasi votimi në Eurovision lejohet vetëm nga shtetet pjesëmarrëse dhe nga vendet e tjera jashtë Shqipërisë.

Sipas udhëzimeve zyrtare të votimit, Shqipëria votohet me numrin 13, ndërsa të gjitha kodet dhe numrat përkatës sipas shteteve mund të gjenden në platformën zyrtare të Eurovision.

Alis përfaqëson Shqipërinë këtë vit me këngën “Nan”, duke synuar kualifikimin në finalen e madhe të Eurovision 2026./Albinfo.ch

---