Raporti i UNICEF-it: Sistemi arsimor zviceran po dështon në barazinë e mundësive

Një studim i fundit i UNICEF-it ka nxjerrë në pah dallime të mëdha sociale në sistemin arsimor të Zvicrës, duke ngritur shqetësime serioze për barazinë e mundësive mes të rinjve. Sipas raportit, 91 për qind e të rinjve nga familje të privilegjuara zotërojnë aftësitë bazë në matematikë dhe lexim, ndërsa vetëm 46 për qind e të rinjve nga shtresat më të pafavorizuara arrijnë të njëjtin nivel.

Profesoresha e proceseve edukative në Universitetin e Cyrihut, Katharina Maag Merki, e cilësoi këtë rezultat si “shumë serioz”, duke theksuar se pasojat ndikojnë në gjithë jetën e të rinjve.

“Ky hendek nënkupton që shumë të rinj nuk përgatiten mjaftueshëm për jetën profesionale, për zgjedhjen e profesionit apo për sfidat që duan të përballojnë. Raporti tregon se ndikohen edhe kënaqësia me jetën dhe shëndeti i tyre”, deklaroi ajo për mediat zvicerane, transmeton albinfo.ch.

Sipas saj, problemi nuk qëndron vetëm te dallimet mes familjeve, por te mënyra se si sistemi arsimor i përforcon këto dallime. Ajo kritikoi veçanërisht ndarjen e nxënësve pas klasës së gjashtë, duke thënë se ky sistem selektiv pengon shumë fëmijë të talentuar të ndjekin rrugë të barabarta arsimore.

“Dallimet mes familjeve janë normale, por mënyra se si ato ndikojnë në suksesin shkollor është kryesisht rezultat i sistemit tonë”, u shpreh Maag Merki.

Ajo kërkoi reforma më të thella në arsimin e hershëm dhe modele më gjithëpërfshirëse në shkollat e mesme të ulëta. Sipas saj, disa kantone zvicerane tashmë kanë nisur të aplikojnë klasa me nivele të përziera, ku nxënësit mësojnë së bashku pa ndarje të hershme sipas performancës.

Ky model, sipas profesoreshës, ka treguar rezultate pozitive edhe në vende të tjera evropiane, ku përzgjedhja akademike bëhet shumë më vonë.

Intervista u realizua nga gazetarja Isabelle Maissen për transmetuesin publik zviceran