Ushtria zvicerane teston dronët e zbulimit dhe sulmit

Ushtria zvicerane ka zhvilluar të hënën në Elm (kantoni Glarus) testime të reja në terren me mini-dronë, në prani të mediave, me qëllim përforcimin e aftësive në përdorimin e këtyre pajisjeve të avancuara që mund të shërbejnë si për zbulim, ashtu edhe për operacione sulmuese me precizion të lartë.

Sipas ushtrisë, dronët po e zgjerojnë gjithnjë e më shumë kapacitetin për zbulim dhe mbështetje luftarake. Mini-dronët përdoren kryesisht për misione vëzhgimi dhe mbledhje informacioni, duke mundësuar inteligjencë në terren pa rrezikuar jetën e ushtarëve.

Megjithatë, ushtria thekson se të pajisur me ngarkesa shpërthyese, këta dronë mund të shndërrohen në armë precize të afta për goditje të synuara. Lufta në Ukrainë ka treguar ndikimin e madh të përdorimit të tyre, duke ndryshuar mënyrën e zhvillimit të konflikteve moderne dhe duke e bërë të domosdoshme mbrojtjen e trupave, pajisjeve dhe infrastrukturës kundër sulmeve me dronë.

Trajnime për pilotët e dronëve FPV

Në kuadër të këtyre zhvillimeve, ushtria zvicerane po trajnon rekrutë për pilotimin e dronëve FPV (First Person View), një metodë që i lejon operatorit të drejtojë dronin përmes syzeve speciale, duke përjetuar pamjen në kohë reale si të ishte brenda pajisjes.

Në ushtrimet e fundit në Elm, të realizuara nga Qendra e Kompetencës për Dronë dhe Robotikë e Mbrojtjes, u testua integrimi i ekipeve të dronëve FPV në formacione luftarake. Në poligonin e qitjes në Wichlen, u vlerësua bashkëpunimi mes njësive të dronëve dhe trupave në terren, si dhe u zhvilluan procedura të reja operative.

Sipas ushtrisë zvicerane, përdorimi i dronëve në kriza dhe konflikte është bërë tashmë standard. Për këtë arsye, në qershor të vitit 2024, Departamenti Federal i Mbrojtjes, Mbrojtjes Civile dhe Sportit krijoi edhe Task Forcën për Dronë.

Autoritetet ushtarake theksojnë se qëllimi i këtyre testimeve të hershme është përgatitja sa më e mirë për përballjen me teknologjitë moderne të luftës dhe përshtatja e strukturave ushtarake me realitetin e konflikteve bashkëkohore.