SBB po shqyrton vendosjen e ekraneve reklamuese në trena, shumica e pasagjerëve kundër

Swiss Federal Railways po vlerëson mundësinë e vendosjes së ekraneve digjitale me reklama në trenat e saj, ngjashëm me sistemin që përdoret tashmë në autobusët postarë në Zvicër.

Sipas një sondazhi të zhvilluar në platformën “community.sbb.ch”, ideja nuk po pritet mirë nga udhëtarët. Mbi 80% e rreth 2,500 pjesëmarrësve janë shprehur kundër vendosjes së ekraneve reklamuese, ndërsa vetëm rreth 10% e mbështesin këtë propozim.

SBB po mbledh opinionet e pasagjerëve deri në fund të majit, ndërsa në një ilustrim të publikuar shihet se ekranet reklamuese do të vendoseshin pranë ekraneve ekzistuese që tregojnë stacionet e ardhshme.

Kundërshtimet kryesore lidhen me shqetësimin për humbjen e qetësisë gjatë udhëtimit dhe ndikimin e mundshëm nga imazhet lëvizëse, të cilat disa pasagjerë i konsiderojnë stresuese, veçanërisht për personat me ndjeshmëri ndaj stimujve.

Debati vazhdon në Zvicër nëse trenat duhet të mbeten hapësira pa reklama digjitale apo nëse këto ekrane mund të përdoren për të mbështetur financimin e transportit publik.