Rregulla të reja për patentën në Zvicër nga viti 2027

Foto ilustrim @pixabay

Nga 1 janari 2027, në Zvicër ndryshon sistemi i marrjes së patentës së shoferit. Kursi i vetëdijes për trafikun (VKU) do të duhet të kryhet para provimit teorik, ndërsa përmbajtja e tij do të zgjerohet me tema të reja si sistemet moderne të ndihmës në vozitje dhe siguria rrugore.

Sipas Zyrës Federale të Rrugëve (ASTRA), edhe provimi teorik do të përfshijë pyetje nga VKU, duke trajtuar çështje si rreziku në trafik, shpërqendrimi dhe efikasiteti energjetik. Autoritetet theksojnë se provimi nuk pritet të bëhet më i vështirë, pasi materiali do të mësohet paraprakisht.

Reforma synon modernizimin e trajnimit të shoferëve, pasi VKU nuk është përditësuar për gati 30 vjet. Instruktorët e vozitjes e mirëpresin ndryshimin, por disa kërkojnë edhe rritje të mëtejshme të kërkesave për përmirësimin e sigurisë rrugore, transmeton albinfo.ch.