Kufizimi i emigracionit nuk pritet ta zgjidhë krizën e banesave në Zvicër

Ekonomisti i Raiffeisen Bank thotë se mungesa e banesave lidhet më shumë me ofertën e pamjaftueshme dhe rregulloret e tepërta sesa me flukset migratore

Mungesa e banesave në Zvicër nuk pritet të zgjidhet përmes kufizimit të emigracionit, ka deklaruar Fredy Hasenmaile, kryeekonomist në Raiffeisen Bank, në një intervistë të fundit, përcjell albinfo.ch.

Sipas tij, kriza e banesave në vend është “kryesisht rezultat i ofertës së pamjaftueshme” dhe më pak një problem i lidhur drejtpërdrejt me migrimin.

Kjo deklaratë bie ndesh me argumentet e përdorura nga Swiss People’s Party (SVP), e cila ka kërkuar vendosjen e kufizimeve më të forta ndaj emigracionit, duke e lidhur rritjen e popullsisë me mungesën e banesave në tregun zviceran.

Hasenmaile theksoi se problemet në sektorin e banimit kanë disa shkaqe, por sipas tij arsyeja kryesore qëndron te mungesa e ofertës dhe pengesat në ndërtim.

“Zvicra ka mjaftueshëm tokë ndërtimore, por ajo mbetet e pashfrytëzuar për shkak të rregulloreve të tepërta”, u shpreh ai.

Debati për emigracionin dhe tregun e banesave është intensifikuar muajt e fundit në Zvicër, veçanërisht në prag të diskutimeve politike mbi politikat e migracionit dhe zhvillimit urban. /Albinfo.ch

---