Pritje deri në tre orë për kosovarët në aeroportin e Baselit

Sistemi i ri i hyrje-daljeve në Evropë dhe fluksi i madh i udhëtarëve po shkaktojnë vonesa të gjata në kufi

Sistemi i ri evropian për kontrollin e hyrje-daljeve, i kombinuar me numrin e madh të fluturimeve gjatë sezonës së udhëtimeve, ka shkaktuar pritje të gjata për qytetarët e Kosovës në aeroportet evropiane, transmeton albinfo.ch.

Të enjten, në aeroportin e Baselit, i cili shërben si pikë hyrëse për Zvicrën, Francën dhe Gjermaninë, pritjet për kontrollin kufitar kanë arritur deri në tre orë.

Shumë udhëtarë kanë raportuar radhë të gjata dhe vonesa të konsiderueshme gjatë procedurave të hyrjes në zonën Schengen, sidomos për shtetasit nga vendet që nuk janë pjesë e Bashkimit Evropian.

Sistemi i ri i hyrje-daljeve (EES), i cili po implementohet gradualisht nga Bashkimi Evropian, synon forcimin e kontrollit kufitar përmes regjistrimit elektronik të hyrjeve dhe daljeve të shtetasve nga vendet e treta.

Autoritetet aeroportuale paralajmërojnë se pritje të ngjashme mund të ketë edhe gjatë javëve në vazhdim, për shkak të fluksit të shtuar të udhëtimeve dhe procedurave të reja të kontrollit. /Albinfo.ch.

---