Gratë në Zvicër kanë më pak besim te shteti sesa burrat

Një studim i OECD-së zbulon një hendek të madh gjinor në besimin ndaj institucioneve publike dhe pjesëmarrjen politike

Gratë në Zvicër kanë më pak besim ndaj institucioneve shtetërore krahasuar me burrat, sipas një studimi të ri të porositur nga Zyra Federale për Barazi Gjinore (FOGE) dhe realizuar nga OECD. Edhe pse niveli i përgjithshëm i besimit në institucionet publike mbetet i lartë në krahasim me vendet e tjera, diferenca mes grave dhe burrave është veçanërisht e theksuar në Zvicër, shkruan swissinfo.ch, transmeton albinfo.ch.

Sipas studimit, vetëm 45 për qind e grave shprehen të sigurta për aftësinë e tyre për të marrë pjesë në politikë, krahasuar me 65 për qind të burrave. Po ashtu, 26 për qind e grave nuk marrin pjesë në asnjë aktivitet politik, ndërsa kjo përqindje është 17 për qind te burrat. Diferenca gjinore në pjesëmarrjen politike është pothuajse dy herë më e lartë se mesatarja e vendeve të OECD-së.

Studimi evidenton gjithashtu dallime në kënaqësinë ndaj shërbimeve publike dhe në perceptimin e institucioneve shtetërore. Sipas autoriteteve zvicerane, këto rezultate tregojnë se ende ekzistojnë pengesa që ndikojnë në angazhimin dhe besimin e grave në jetën publike dhe politike.

Ekspertët theksojnë se besimi në institucione është një element kyç për funksionimin e demokracisë dhe se zvogëlimi i këtij hendeku gjinor mbetet një sfidë e rëndësishme për Zvicrën në vitet e ardhshme.

---