Zvicër: Debat i ri për shtrëngimin e politikës së azilit, modeli danez në fokus

(KEYSTONE/Christian Beutler)

Pas refuzimit të iniciativës “Zvicra me 10 milionë banorë”, debati për migracionin dhe azilin në Zvicër po vazhdon. Deputeti i FDP-së në Këshillin Kombëtar, Damian Müller, ka paralajmëruar një nismë të re për shtrëngimin e politikës së azilit, duke marrë si shembull modelin e Danimarkës.

Sipas propozimit, Danimarka shihet si model për një qasje më të rreptë ndaj azilit, ku theksi vendoset te qëndrimi i përkohshëm, kufizimi i bashkimit familjar dhe ulja e përfitimeve sociale për azilkërkuesit. Në Danimarkë, lejet e qëndrimit rishikohen rregullisht dhe mund të mos rinovohen nëse situata në vendin e origjinës përmirësohet.

Një tjetër element i diskutuar është edhe politika më kufizuese për bashkimin familjar, si dhe masa që synojnë të ulin atraktivitetin e vendit për azilkërkuesit, përfshirë reduktimin e ndihmave sociale. Modeli danez përfshin gjithashtu masa të ashpra në raste të refuzimit të azilit dhe procedura të mundshme për transferimin e kërkesave në vende të treta.

Sipas Müller, qëllimi është ulja e ndjeshme e numrit të kërkesave për azil në Zvicër. Ai argumenton se këto masa janë në përputhje me kornizën ligjore evropiane dhe marrëveshjet ndërkombëtare të Zvicrës.

Megjithatë, modeli danez mbetet i debatueshëm. Kritikët paralajmërojnë se politika të tilla mund të rrisin pasigurinë e azilkërkuesve, të pengojnë integrimin dhe të çojnë në ndarje familjesh për periudha të gjata.

Debati për politikën e azilit pritet të vazhdojë në skenën politike zvicerane gjatë muajve të ardhshëm.