Qindra kompani në Cyrih paguajnë punëtorët nën standardet ligjore

396 kompani në Cyrih nuk respektuan standardet e pagave

Kontrollet e autoriteteve të kantonit të Cyrihut zbuluan se gati 400 kompani kanë shkelur rregullat për pagat gjatë vitit 2025, me shkelje më të shpeshta te punëdhënësit e huaj, përcjell albinfo.ch.

Qindra kompani në kantonin e Cyrihut janë konstatuar se nuk u kanë paguar punëtorëve pagat sipas standardeve të përcaktuara.

Sipas të dhënave për vitin 2025, autoritetet kantonale analizuan gjithsej 1.927 kompani, ndërsa në 396 prej tyre u identifikuan shkelje të rregullave për pagat.

Shkeljet rezultuan dukshëm më të shpeshta te punëdhënësit e huaj. Nga 371 kompani të huaja të kontrolluara nga Departamenti i Ekonomisë i kantonit të Cyrihut, 147 nuk u kishin paguar punonjësve pagat e zakonshme sipas sektorit dhe profesionit.

Ndërkohë, edhe te kompanitë zvicerane u evidentuan parregullsi. Nga 1.556 kompani të kontrolluara, 249 rezultuan se nuk kishin respektuar standardet lokale dhe ato të industrisë për nivelin e pagave. /Albinfo.ch

---