Vala e të nxehtit po përshpejton shkrirjen e akullnajave në Zvicër

Ekspertët paralajmërojnë për humbje masive të akullit pas më shumë se dy javësh temperatura të larta

Vala e zgjatur e të nxehtit që ka përfshirë Zvicrën gjatë muajit qershor po përshpejton ndjeshëm shkrirjen e akullnajave, paralajmërojnë ekspertët e klimës, përcjell albinfo.ch.

Sipas Matthias Huss, drejtues i Rrjetit Zviceran të Monitorimit të Akullnajave, periudhat e gjata me temperatura të larta përbëjnë skenarin më të keq të mundshëm për akullnajat.

“Një ose dy ditë me vapë të fortë nuk shkaktojnë shkrirje të konsiderueshme. Por kur temperaturat e larta zgjasin më shumë se dy javë, siç ka ndodhur këtë qershor, shkrirja bëhet masive, madje edhe në rajonet më të larta malore”, ka theksuar ai.

Sipas të dhënave të monitorimit, aktualisht nga akullnajat zvicerane rrjedhin rreth 400 metra kub ujë në sekondë.

“Ky është një volum i barabartë me mbushjen e një pishine olimpike çdo gjashtë sekonda, pa ndërprerje, ditë e natë, gjatë të paktën këtyre dy javëve të valës së të nxehtit”, ka shpjeguar Huss.

Ekspertët paralajmërojnë se ngrohja globale dhe valët gjithnjë e më të shpeshta të të nxehtit po rrezikojnë seriozisht akullnajat zvicerane, të cilat kanë humbur sasi rekord të akullit gjatë viteve të fundit. /Albinfo.ch

---