Cyrihu nuk është më qyteti i dytë më i mirë për të jetuar në botë

Qyteti zviceran ka rënë në vendin e pestë në renditjen globale të vitit 2026, ndërsa Kopenhaga vazhdon të kryesojë listën

Cyrihu nuk renditet më si qyteti i dytë më i mirë për të jetuar në botë. Sipas edicionit të ri të Global Liveability Index 2026, të publikuar nga Economist Intelligence Unit, metropoli zviceran ka humbur tri pozita dhe tani ndodhet në vendin e pestë, transmeton albinfo.ch.

Në krye të renditjes mbetet Kopenhaga, e cila është shpallur qyteti më i mirë për të jetuar për të dytin vit radhazi. Kryeqyteti danez ka marrë vlerësime maksimale në stabilitet, arsim dhe infrastrukturë. Pas tij renditen Vjena dhe Melburni, ndërsa Sidnei zë vendin e katërt.

Megjithëse Cyrihu ka humbur pozita, ai vazhdon të jetë mes qyteteve më të vlerësuara në botë. Një tjetër qytet zviceran, Gjeneva, renditet menjëherë pas tij në vendin e gjashtë, duke e bërë Zvicrën një nga vendet e pakta me dy qytete në dhjetëshen e parë.

Renditja përfshin gjithsej 173 qytete dhe bazohet në dhjetëra indikatorë të ndarë në pesë kategori kryesore: stabiliteti, kujdesi shëndetësor, kultura dhe mjedisi, arsimi dhe infrastruktura.

Sipas raportit, Evropa Perëndimore vazhdon të mbetet rajoni më i mirë për cilësinë e jetës, por rezultatet e saj kanë ngecur, ndërsa disa qytete aziatike kanë shënuar përmirësim të dukshëm. Në dhjetëshen e parë janë futur edhe Osaka dhe Tokio nga Japonia, si dhe tri qytete australiane.

Në fund të renditjes vazhdon të mbetet Damasku, i ndikuar rëndë nga konfliktet, pasiguria dhe kushtet e vështira ekonomike.

---