Skandali me Volkswagenin prek edhe Evropën

Keystone

Skandali me emetimin e gazrave të veturave të prodhuesit gjerman Volkswagen që shpërtheu ditë më parë nuk kufizohet vetëm në SHBA. Kolosi gjerman i automobilave ka manipuluar të dhënat  e testit të gazit të makinave të tij dizel edhe në Evropë.

Koncerni ka pranuar para një komisioni hetues se kjo gjë qëndron, ka thënë për medie ministri gjerman i komunikacionit Alexander Dobrindt. Por, ende nuk ka informacione se për sa makina bëhet fjalë dhe se cilat modele janë më të goditura nga kjo.

Ndërkohë komisioni i  BE-së u ka apeluar vendeve anëtare që të hetojnë lidhur me manipulimet e mundshme me emetimin e gazit të makinave dizel të VW.

Si pasojë e skandalit të madh që ka plasur, të mërkurën ka dhënë dorëheqje nga detyra shefi i koncernit, Martin Winterkorn.

Siç dihet, afera ka shpërthyer në SHBA ku është konstatuar se rreth 11 milionë vetura të Volkswagenit që janë shitura me reklamën se nuk emetojnë gazra në të vërtetë e bëjnë këtë.