Alarmi maksimal për zjarre në disa rajone të Zvicrës

Vapa dhe thatësira kanë rritur rrezikun e zjarreve pyjore në nivelin më të lartë në pjesë të Valisit dhe Graubündenit.

Autoritetet zvicerane kanë ngritur në nivelin maksimal të rrezikut për zjarre pyjore disa zona të vendit, ndërsa vala e të nxehtit dhe mungesa e reshjeve vazhdojnë, transmeton albinfo.ch.

Sipas hartës së rrezikut nga zjarret, pjesa më e madhe e Zvicrës është ngjyrosur me të kuqe që nga java e kaluar, që tregon një rrezik të lartë. Megjithatë, në disa rajone situata është përkeqësuar dhe niveli ka kaluar në alarm të shkallës 5, që është niveli më i lartë.

Ky alarm është shpallur në disa pjesë të kantonit Valis, veçanërisht në zonat përreth Sionit, Zermattit dhe Brigut. Rrezik maksimal raportohet gjithashtu në pjesë të kantonit Graubünden, kryesisht rreth Kuris dhe rajonit të Surselvës së Poshtme.

Për shkak të kushteve ekstreme të motit, thatësirës së vazhdueshme dhe temperaturave të larta, autoritetet paralajmërojnë për rrezik të madh të përhapjes së shpejtë të zjarreve.

Ndërkohë, në të 26 kantonet e Zvicrës vazhdon të jetë në fuqi ndalimi për ndezjen e zjarreve në natyrë, përfshirë zonat pranë pyjeve.

Autoritetet u bëjnë thirrje qytetarëve dhe turistëve të tregojnë kujdes të veçantë dhe të respektojnë masat e vendosura për të shmangur zjarret gjatë periudhës së vapës dhe thatësirës. /Albinfo.ch

---