Zvicra paguan miliona franga pensione jashtë vendit për persona që nuk u takojnë

Një raport i Kontrollit Federal të Financave zbulon mangësi në sistemin AHV/AVS dhe vështirësi në rikuperimin e pagesave të gabuara.

Zvicra ka paguar rreth 40 milionë franga në formë pensionesh shtetërore për persona që nuk kanë pasur të drejtë t’i marrin këto përfitime, sipas një raporti të ri të Kontrollit Federal të Financave (CDF), përcjell albinfo.ch.

Raporti ka zbuluar se skema e pensioneve AHV/AVS ka vazhduar të dërgojë pagesa për pensionistë që jetojnë në vende me të cilat Zvicra nuk ka marrëveshje të ndërsjellë për sigurimet shoqërore.

Kjo situatë paraqet një shqetësim për qëndrueshmërinë e sistemit të pensioneve zvicerane, i cili prej vitesh po përballet me sfida për të garantuar financimin afatgjatë dhe mbrojtjen e fondeve për gjeneratat e ardhshme.

Sipas raportit, një nga problemet kryesore është se autoritetet zvicerane kanë hasur vështirësi të mëdha në rikuperimin e shumave të paguara gabimisht. Në shumë raste, kthimi i këtyre fondeve nga jashtë vendit është i komplikuar ose praktikisht i pamundur.

Kontrolli Federal i Financave kërkon përmirësime në procedurat e kontrollit dhe mbikëqyrjes, në mënyrë që pagesat e pensioneve të bëhen vetëm për personat që plotësojnë kushtet ligjore.

Sistemi AHV/AVS është një nga shtyllat kryesore të sigurimit social në Zvicër dhe mbulon miliona persona, përfshirë edhe pensionistë që jetojnë jashtë vendit. /Albinfo.ch

---