Oficeri i FSK-së, Bujar Ferizi, diplomon në Kolegjin Ndërkombëtar të Shtabit të Përgjithshëm në Gjermani

Majori i Forcës së Sigurisë së Kosovës përfundoi me sukses programin prestigjioz LGAI në Akademinë e Lidershipit të Bundeswehr-it, duke përfaqësuar Kosovën mes 74 oficerëve nga 36 shtete.

Një tjetër sukses i Forcës së Sigurisë së Kosovës është shënuar në arenën ndërkombëtare. Majori Bujar Ferizi ka përfunduar me sukses programin prestigjioz Lehrgang Generalstabs-/Admiralstabsdienst International (LGAI) në Akademinë e Lidershipit të Bundeswehr-it në Hamburg të Gjermanisë, transmeton albinfo.ch.

Programi, i cili zgjat gjithsej 17 muaj, përfshin pesë muaj trajnim intensiv të gjuhës gjermane në Bundessprachenamt në Hürth, si përgatitje për studimet, dhe më pas 12 muaj trajnim të avancuar në fushat e planifikimit strategjik, lidershipit ushtarak, bashkëpunimit shumëkombësh dhe sigurisë ndërkombëtare.

Në këtë gjeneratë morën pjesë 74 oficerë nga 36 shtete të ndryshme të botës, ndërsa Majori Bujar Ferizi përfaqësoi Republikën e Kosovës dhe Forcën e Sigurisë së Kosovës, duke kontribuar në shkëmbimin e përvojave profesionale dhe në forcimin e bashkëpunimit ndërkombëtar me vendet partnere.

Diplomimi në këtë program konsiderohet një arritje e rëndësishme profesionale dhe një investim me vlerë në zhvillimin e kapaciteteve të FSK-së, në përputhje me standardet e NATO-s dhe të forcave të armatosura të vendeve partnere.

Ky sukses dëshmon për nivelin e lartë profesional të oficerëve të Forcës së Sigurisë së Kosovës dhe përkushtimin e tyre për ngritjen e vazhdueshme të kapaciteteve në shërbim të sigurisë dhe mbrojtjes së vendit./Albinfo.ch

 

---