Marrëveshje e re Zvicër-Britani: kalim më i shpejtë në aeroporte dhe lehtësi për punëtorët

Britanikët do të përdorin portat elektronike, ndërsa profesionistët do të mund të punojnë pa vizë deri në 90 ditë

Qytetarët britanikë që udhëtojnë drejt Zvicrës pritet të përfitojnë nga procedura më të shpejta në aeroporte dhe nga roamingu falas për telefoninë mobile, falë një marrëveshjeje të re tregtare ndërmjet Zvicrës dhe Mbretërisë së Bashkuar.

Sipas marrëveshjes, shtetasit britanikë do të mund të përdorin portat elektronike, të njohura si e-gates, gjatë kontrolleve kufitare në aeroportet zvicerane. Aeroporti i Cyrihut pritet të jetë i pari që do ta zbatojë këtë mundësi, ndërsa Gjeneva dhe aeroportet e tjera synojnë ta ofrojnë deri në fund të vitit.

Marrëveshja parashikon gjithashtu që profesionistët të mund të punojnë pa vizë në vendin tjetër për deri në 90 ditë brenda një viti. Kjo pritet të lehtësojë angazhimet afatshkurtra, bashkëpunimet profesionale dhe ofrimin e shërbimeve ndërmjet dy vendeve, transmeton albinfo.ch.

Një ndryshim i rëndësishëm vlen edhe për kompanitë britanike. Ato do të mund t’i transferojnë punonjësit në operacionet e tyre në Zvicër për një periudhë deri në pesë vjet, pa pasur nevojë t’i nënshtrohen testit zviceran për nevojat ekonomike të tregut të punës.

Ky lehtësim pritet ta bëjë dukshëm më të thjeshtë lëvizjen e stafit ndërmjet Zvicrës dhe Britanisë së Madhe, si dhe të forcojë bashkëpunimin ekonomik dhe tregtar mes dy vendeve.

---