Sot i jepet lamtumira e fundit 20-vjeçarit nga Kosova që u vra tragjikisht në Suedi

Gent Maksutaj do të varroset në fshatin Banjë, ndërsa autoritetet suedeze po vazhdojnë hetimet për vrasjen që dyshohet se ndodhi gjatë një përleshjeje mes bandave kriminale.

Sot do t’i jepet lamtumira e fundit Gent Maksutajt, 20-vjeçarit me prejardhje nga Kosova, i cili humbi jetën në mënyrë tragjike më 5 korrik në Suedi, transmeton albinfo.ch.

Ceremonia e varrimit do të zhvillohet në varrezat e fshatit Banjë, me fillim nga ora 16:00, ku familjarë, të afërm dhe miq do ta përcjellin për në banesën e fundit.

Sipas dyshimeve të para të autoriteteve suedeze, i riu u vra aksidentalisht gjatë një përleshjeje mes bandave kriminale, një ngjarje që ka tronditur komunitetin shqiptar në Suedi dhe Kosovë.

Mediat suedeze kanë raportuar gjerësisht për rastin, duke publikuar detaje të reja nga hetimet. Sipas Policisë suedeze, personi i dyshuar për të shtënat është larguar nga vendi i ngjarjes me tren në drejtim të Stokholmit, ku më pas është arrestuar gjatë mbrëmjes ose natës.

Hetimet për zbardhjen e plotë të rrethanave të ngjarjes janë ende në vazhdim, ndërsa autoritetet suedeze po punojnë për të sqaruar të gjitha detajet që çuan në vdekjen tragjike të 20-vjeçarit./Albinfo.ch

---