Aplikimet për azil në Zvicër ranë me 16 për qind në gjysmën e parë të vitit 2026

(KEYSTONE/Gaetan Bally)

Numri i kërkesave për azil në Zvicër ka shënuar rënie të ndjeshme gjatë gjysmës së parë të vitit 2026. Sipas të dhënave të publikuara nga Sekretariati Shtetëror për Migracionin (SEM), nga janari deri në fund të qershorit janë regjistruar gjithsej 9.734 aplikime për azil, ose 16 për qind më pak krahasuar me të njëjtën periudhë të vitit të kaluar.

SEM e lidh këtë rënie me uljen e numrit të mbërritjeve të migrantëve në jug të Italisë, si dhe me numrin më të vogël të aplikimeve të paraqitura nga shtetasit turq.

Vetëm gjatë muajit qershor 2026 janë regjistruar 1.777 kërkesa për azil, që përbën një rënie prej 20 për qind në krahasim me qershorin e vitit 2025. Megjithatë, krahasuar me muajin maj të këtij viti, numri i aplikimeve është rritur me 9 për qind.

Sipas statistikave zyrtare, numrin më të madh të aplikuesve në qershor e përbënin shtetasit e Afganistanit me 456 kërkesa, të ndjekur nga Eritrea me 222, Algjeria me 175, Turqia me 140 dhe Somalia me 139 aplikime.

Gjatë muajit qershor, autoritetet zvicerane morën vendim për 2.235 kërkesa për azil, ndërsa pothuajse një e treta e aplikantëve fituan statusin e azilantit.

Po ashtu, 872 persona u larguan nga Zvicra nën mbikëqyrjen e autoriteteve. Prej tyre, 527 u larguan vullnetarisht, ndërsa 345 persona u kthyen në vendet e tyre të origjinës ose në vende të treta.

Sipas SEM, tendenca e rënies së kërkesave për azil lidhet kryesisht me ndryshimet në flukset migratore përgjatë rrugëve që çojnë drejt Evropës Perëndimore.