Temperaturat e natës në Zvicër bien më në fund, fund netëve tropikale

Pas javësh me vapë rekord, meteorologët paralajmërojnë net më të freskëta që do të sjellin lehtësim për banorët.

Pas disa javësh me temperatura rekord dhe net tropikale, moti në Zvicër po sjell më në fund një lehtësim të mirëpritur, përcjell albinfo.ch.

Edhe pse temperaturat gjatë ditës do të vazhdojnë të mbeten të larta, meteorologët bëjnë të ditur se netët do të jenë dukshëm më të freskëta.

“Është një lehtësim i vërtetë pas javëve të fundit”, tha meteorologu Peter Wick.

Sipas tij, në disa rajone temperaturat gjatë natës pritet të zbresin deri në 15 gradë Celsius në ditët në vijim, duke krijuar kushte shumë më të favorshme për gjumë dhe pushim.

Rënia e temperaturave gjatë natës vjen pas një periudhe kur Zvicra u përball me një valë të fuqishme të nxehti, gjatë së cilës netët u cilësuan si “tropikale”, pasi temperaturat nuk zbrisnin nën 20 gradë Celsius. /Albinfo.ch

---