Zvicra nis digjitalizimin e procedurave për marrjen e shtetësisë

Nga 1 gushti, autoritetet federale dhe kantonale do të shkëmbejnë në mënyrë elektronike dokumentet e aplikimeve për natyralizim.

Zvicra do të hedhë një tjetër hap drejt digjitalizimit të shërbimeve publike. Duke filluar nga 1 gushti, Këshilli Federal do të nisë zbatimin e një sistemi të ri elektronik për procedurat e aplikimit për shtetësi zvicerane, përcjell albinfo.ch.

Projekti synon të zëvendësojë komunikimin me postë mes autoriteteve federale dhe atyre kantonale me një sistem digjital, duke përshpejtuar përpunimin e dosjeve të natyralizimit.

Sipas autoriteteve, kantonet do të mund t’i dërgojnë aplikimet për natyralizim Sekretariatit Shtetëror për Migracionin (SEM) përmes Sistemit Qendror të Informacionit për Migracionin. Në të njëjtën mënyrë, SEM do t’u komunikojë kantoneve vendimin për miratimin ose refuzimin e autorizimit federal për shtetësi.

Sistemi i ri do të testohet fillimisht në disa kantone në kuadër të një faze pilot, ndërsa më vonë pritet të zgjerohet në të gjithë Zvicrën.

Megjithatë, kjo risi nuk do të vlejë për të gjitha aplikimet. Në fazën e parë, sistemi do të përdoret vetëm për procedurat e zakonshme të natyralizimit, ndërsa ato të përshpejtuara nuk do të përfshihen.

Autoritetet nuk kanë sqaruar ende nëse digjitalizimi do të lehtësojë drejtpërdrejt edhe procesin për aplikantët, apo nëse për momentin ai do të shërbejë vetëm për komunikimin ndërmjet institucioneve shtetërore. /Albinfo.ch

---