Gjenden të sigurt dy motoristët e humbur në Majën e Jezercës

Operacioni i kërkim shpëtimit përfundoi me sukses pas disa orësh në terrenin e vështirë malor, falë angazhimit të ekipeve të Kosovës dhe Shqipërisë.

Dy motoristët që ishin raportuar të humbur në zonën e Majës së Jezercës janë gjetur shëndoshë e mirë pas një operacioni të suksesshëm kërkim shpëtimi, i cili zgjati disa orë në një nga zonat më të vështira malore në Alpet Shqiptare, përcjell albinfo.ch.

Sipas Shoqatës së Kosovës për Kërkim dhe Shpëtim, Departamenti i Motoristëve arriti t’i lokalizojë dhe t’i tërheqë motoristët në një vend të sigurt, duke përmbyllur me sukses aksionin.

Operacioni u zhvillua në bashkëpunim me Policinë e Shtetit të Shqipërisë dhe ekipet shqiptare të kërkim shpëtimit, të cilat punuan në kushte të vështira për shkak të relievit të thyer të zonës së Jezercës. Koordinimi mes ekipeve bëri të mundur përfundimin me sukses të misionit pa pasoja për motoristët.

Një ditë më parë ishte raportuar se dy motoristët kishin humbur orientimin në zonën malore, ndërsa menjëherë ishte organizuar aksioni i kërkimit. Lajmi për gjetjen e tyre është pritur me lehtësim nga familjarët dhe nga ekipet që morën pjesë në operacion.

---