Twint sjell pagesat automatike nga viti 2027

@unsplash

Aplikacioni i pagesave Twint do të prezantojë nga viti 2027 një funksion të ri për debitimin direkt, duke u mundësuar përdoruesve të kryejnë dhe menaxhojnë pagesat e përsëritura drejtpërdrejt në aplikacion.

Përmes këtij funksioni, faturat e energjisë elektrike, sigurimet shëndetësore dhe abonimet do të mund të paguhen automatikisht, pa pasur nevojë për formularë në letër apo procedura të tjera administrative.

Twint synon që shërbimi i ri të jetë një alternativë ndaj procedurës tradicionale të debitimit direkt, e cila në Zvicër pritet të ndërpritet në fund të shtatorit 2028.

Sipas kompanisë, sistemi i ri do të sjellë përfitime edhe për bizneset dhe lëshuesit e faturave, duke ulur punën administrative dhe rastet e faturave të harruara.

Twint, i cili sipas të dhënave të veta ka më shumë se 6 milionë përdorues aktivë, mbështetet nga bankat kryesore zvicerane dhe kompanitë SIX dhe Worldline.

Funksioni i ri pritet të jetë në dispozicion për përdoruesit nga viti 2027.