Thatësira detyron fermerët zviceranë t’i zbresin bagëtitë më herët nga kullotat alpine

Ekspertët paralajmërojnë se, për shkak të ndryshimeve klimatike, verat e thata mund të bëhen gjithnjë e më të shpeshta

Thatësira e vazhdueshme në Zvicër po shkakton pasoja serioze edhe për bujqësinë alpine. Disa fermerë tashmë janë detyruar t’i zbresin bagëtitë nga kullotat malore më herët se zakonisht, për shkak të mungesës së ujit dhe ushqimit për kafshët.

Sipas Selina Droz, drejtoreshë e Federatës Zvicerane të Ekonomisë Alpine (FSEA), veçanërisht të prekura janë rajoni i Jurës, Zvicra frëngjishtfolëse dhe pjesë të Zvicrës lindore, ndërsa situata konsiderohet kritike në gjithë vendin.

Nuk ka ende shifra të sakta për numrin e fermave që kanë përshpejtuar zbritjen e bagëtive. Në shumicën e rasteve, fermerët kanë larguar vetëm një pjesë të kafshëve nga kullotat alpine, në përpjekje për të kursyer ujin e pijshëm dhe rezervat e ushqimit, shkruan Swissinfo.ch, transmeton albinfo.ch.

Gjendja është problematike edhe për fermat në ultësira, pasi thatësira ka reduktuar rezervat e ushqimit edhe atje.

Në raste ekstreme, një nga alternativat mbetet therja e parakohshme e bagëtive, masë që disa fermerë tashmë e kanë ndërmarrë.

Thatësira pritet të ndikojë gjithashtu në prodhimin e djathit alpin. FSEA parashikon prodhim nën mesataren për këtë vit, ndërsa për djathin Gruyère d’alpage pritet një rënie prej rreth 10 për qind krahasuar me vitin e kaluar.

Ekspertët paralajmërojnë se, për shkak të ndryshimeve klimatike, verat e thata mund të bëhen gjithnjë e më të shpeshta. Për këtë arsye, fermat alpine po inkurajohen të përmirësojnë infrastrukturën e furnizimit me ujë, përfshirë ndërtimin e rezervuarëve të rinj dhe shfrytëzimin e burimeve.

Zvicra ka rreth 6,600 kullota alpine, të cilat prodhojnë afërsisht 5,500 tonë djathë alpin në vit.

---