Ofruesit e shërbimeve publike në Zvicër nuk detyrohen të pranojnë para të gatshme

Mbështetësit e propozimit kanë argumentuar se disa kategori të popullsisë, veçanërisht të moshuarit dhe turistët e huaj, vazhdojnë të varen nga pagesat me para të gatshme

Ofruesit e shërbimeve publike në Zvicër nuk do të detyrohen me ligj që të pranojnë pagesa me para të gatshme.

Komisioni për Çështje Ekonomike i Këshillit Kombëtar ka refuzuar me rezultat të ngushtë një propozim që synonte ta bënte të detyrueshme pranimin e parave të gatshme nga ofruesit e shërbimeve publike, përfshirë kompanitë e transportit publik.

Mbështetësit e propozimit kanë argumentuar se disa kategori të popullsisë, veçanërisht të moshuarit dhe turistët e huaj, vazhdojnë të varen nga pagesat me para të gatshme, transmeton albinfo.ch.

Megjithatë, shumica në komision vlerësoi se ofruesit e shërbimeve publike duhet të kenë lirinë që të vendosin vetë nëse do të pranojnë ose jo pagesa fizike.

Vendimi vjen në një kohë kur transporti publik në Zvicër po kalon gjithnjë e më shumë drejt digjitalizimit të shitjes së biletave. Sportelet tradicionale janë reduktuar ndjeshëm, ndërsa edhe makinat automatike për bileta po bëhen më të rralla, duke shtuar shqetësimet për personat që nuk përdorin telefona inteligjentë.

---