Mbi 30 gradë gjatë javës në Zvicër

(KEYSTONE/Peter Schneider)

Zvicra do të përjetojë ditë me mot të ndryshueshëm, nga dielli dhe temperaturat verore deri te reshjet dhe stuhitë. Pas një fillimi kryesisht me diell, temperaturat pritet të kalojnë sërish mbi 30 gradë gjatë javës së ardhshme, përcjell albinfo.ch.

Të hënën, gjatë ditës pritet ngrohje e mëtejshme, me temperatura që do të lëvizin nga 26 deri në 28 gradë. Në mbrëmje, nga jugperëndimi pritet shtim i vranësirave.

Ndryshimi më i madh i motit pritet gjatë natës së së hënës drejt së martës. Në veri parashikohen kryesisht reshje shiu dhe vetëm lokalisht ndonjë stuhi, ndërsa në jug të Zvicrës reshjet dhe stuhitë mund të jenë më të fuqishme, veçanërisht të martën në mëngjes.

Gjatë së martës situata pritet të përmirësohet shpejt, me rikthimin gradual të diellit nga perëndimi. Megjithatë, në zonat malore nuk përjashtohen reshje ose stuhi të izoluara gjatë pasdites dhe mbrëmjes.

Vera nuk do të përfundojë me kaq. Të mërkurën temperaturat pritet të arrijnë nga 27 deri në 29 gradë, ndërsa të enjten termometri mund të shënojë 28 deri në 31 gradë.

Sipas parashikimeve aktuale, e enjtja pritet të jetë dita më e nxehtë, veçanërisht në Zvicrën veriperëndimore dhe në luginat ku ndikon era Föhn.

Megjithatë, nga mbrëmja e së enjtes ose gjatë natës drejt së premtes, një front i ftohtë pritet të arrijë në Zvicër, duke sjellë një tjetër ndryshim të motit. /albinfo.ch/