16 shkolla fillore pritet të mbyllen në Maqedoninë e Veriut

Viti i ri shkollor pritet të nisë me rreth 3 mijë nxënës më pak krahasuar me vitin e kaluar

Në Maqedoninë e Veriut pritet të mbyllen 16 shkolla fillore, kryesisht shkolla periferike në vendbanime rurale, ndërsa vendi po përballet me rënie të vazhdueshme të numrit të nxënësve.

Ministria e Arsimit dhe Shkencës ka paralajmëruar prej kohësh riorganizimin e rrjetit të shkollave, proces që pritet të vazhdojë edhe në të ardhmen për shkak të numrit gjithnjë e më të vogël të nxënësve, përcjell albinfo.ch.

Sipas të dhënave të publikuara, në vitin e ri shkollor në bankat e shkollave pritet të ulen rreth 3 mijë nxënës më pak krahasuar me vitin e kaluar.

Nga Ministria kanë sqaruar se nuk është ky institucion që i mbyll drejtpërdrejt shkollat, por komunave u sugjerohet se cilat shkolla mund të mbyllen ose të bashkohen me shkollat qendrore për shkak të numrit të vogël të nxënësve.

Sipas MASH-it, riorganizimi synon t’u krijojë fëmijëve më shumë mundësi për ndërveprim me bashkëmoshatarët, por edhe të shmangë shpenzimet për mirëmbajtjen e objekteve shkollore që në disa raste kanë më pak se dhjetë nxënës.

Rënia e numrit të nxënësve është një trend afatgjatë. Në shtatë vitet e fundit, Maqedonia e Veriut ka humbur rreth 17 mijë nxënës, ndërsa gjatë një periudhe pesëvjeçare janë mbyllur rreth 30 shkolla për shkak të mungesës së nxënësve.

---