Zvicër: Propozohet kufizimi i qasjes në psikoterapi

@envato

Një komision i Këshillit Kombëtar të Zvicrës po kërkon rikthimin e rregullave më të rrepta për rimbursimin e psikoterapisë nga sigurimi i detyrueshëm shëndetësor. Propozimi ka shkaktuar reagim të fortë nga specialistët e shëndetit mendor, të cilët paralajmërojnë se mund të vështirësojë qasjen e pacientëve në trajtim.

Që nga reforma e vitit 2022, në Zvicër psikologët mund të ofrojnë psikoterapi në mënyrë të pavarur, ndërsa për rimbursimin e trajtimit nga sigurimi shëndetësor mjafton një përshkrim nga mjeku i përgjithshëm.

Tani, shumica e djathtë në Komisionin për Sigurinë Sociale dhe Shëndetin Publik të Këshillit Kombëtar kërkon rikthimin e modelit të mëparshëm, ku psikoterapia duhej të delegohej nga një psikiatër dhe të bazohej në një diagnozë të përcaktuar.

Mbështetësit e ndryshimit argumentojnë se shpenzimet për psikoterapi janë rritur ndjeshëm pas reformës: nga pak mbi 500 milionë franga në vitin 2021 në mbi 900 milionë në vitin 2024. Sipas tyre, rritja e kostove ndikon edhe në primet e sigurimit shëndetësor.

Por Federata Zvicerane e Psikologëve e kundërshton këtë qasje. Bashkëpresidenti i saj, Loris Rohrbach Grandjean, thotë se pacientët që trajtohen përmes psikoterapisë kanë probleme reale të shëndetit mendor dhe jo thjesht nevoja për “terapi komoditeti”.

Sipas tij, rikthimi i sistemit të vjetër do të krijonte një pengesë shtesë për pacientët, pasi ata do të duhej të kalonin fillimisht te një psikiatër, gjë që mund të shkaktonte vonesa në trajtim.

Specialistët paralajmërojnë se vonesat ose mungesa e trajtimit mund t’i bëjnë çrregullimet psikike kronike dhe, në afat të gjatë, të rrisin kostot për pacientët, sistemin shëndetësor dhe shoqërinë.

Debati pritet të kalojë së shpejti në Këshillin Kombëtar, i cili do të vendosë nëse do të mbështesë kufizimin e propozuar të qasjes në psikoterapi.