Automjetet e mëdha mund të ndalohen në transportin hekurudhor të Furkës

Nga 1 nëntori, kamionët, autokarvanët dhe automjetet mbi 3.05 metra lartësi mund të mos lejohen më në trenin që transporton automjetet përmes tunelit Furka. Vendimi përfundimtar pritet nga autoritetet federale.

Automjetet e mëdha mund të përballen me një ndalim të ri në transportin hekurudhor përmes tunelit Furka, i cili lidh Oberwaldin në kantonin Valais me Realpin në kantonin Uri, transmeton albinfo.ch.

Sipas planit të Matterhorn Gotthard Bahn, nga 1 nëntori automjetet me lartësi mbi 3.05 metra nuk do të lejohen më të transportohen në trenat që kalojnë përmes tunelit.

Masa do të prekë veçanërisht kamionët, autokarvanët dhe automjetet e tjera të larta.

Arsyeja: siguria

Kompania hekurudhore ka propozuar këtë kufizim për arsye sigurie. Transporti i automjeteve përmes tunelit Furka bëhet me tren, duke mundësuar lidhjen rrugore mes Oberwaldit dhe Realpit, sidomos gjatë periudhave kur kalimi rrugor përmes qafës së Furkës është i pamundur.

Sipas planit të ri, kufiri maksimal i lejuar për automjetet do të jetë 3.05 metra lartësi.

Megjithatë, ndalimi ende nuk është përfundimtar. Zyra Federale e Transportit e Zvicrës duhet të marrë vendimin përfundimtar lidhur me propozimin.

Nëse masa miratohet, drejtuesit e automjeteve mbi këtë lartësi do të duhet të përdorin rrugë alternative për të kaluar mes kantoneve Valais dhe Uri. /Albinfo.ch

---