“Mafia e sotme në Zvicër ka profil sipërmarrës”, shpjegon eksperti Francesco Lepori

Në Bellinzona ka nisur gjyqi ndaj një shtetasi italian, i dyshuar për lidhje me organizatën mafioze ‘Ndrangheta. Eksperti Francesco Lepori thotë se mafia kalabreze është integruar në mënyrë të heshtur në shoqërinë zvicerane dhe se aktivitetet kriminale janë ndërthurur me biznese të ligjshme.

Në Gjykatën Federale Penale në Bellinzona ka nisur gjyqi ndaj një personi të dyshuar si anëtar i ‘Ndranghetës, një prej organizatave mafioze më të fuqishme në Itali.

Çështja gjyqësore nxjerr në pah rrënjët e thella që mafia kalabreze ka krijuar në Zvicër. Sipas Francesco Leporit, drejtues i Observatorit Ticinez për Krimin e Organizuar, mafia e ditëve të sotme ka marrë gjithnjë e më shumë një karakter sipërmarrës.

“Mafia italiane ka qenë e pranishme në territorin tonë prej një kohe të gjatë dhe është përfshirë në një sërë aktivitetesh, nga trafiku i drogës dhe armëve deri te pastrimi i parave”, tha Lepori në programin Forum.

Nga aktivitetet e paligjshme te bizneset e ligjshme

Gjyqi ndaj një italiani me banim në kantonin Aargau, i akuzuar se ka vepruar si përfaqësues në Zvicër i një prej celulave më të fuqishme të krimit të organizuar kalabrez, tregon, sipas Leporit, se si ka ndryshuar mënyra e veprimit të mafies.

“Mafia e sotme ka një vokacion sipërmarrës. Nga njëra anë janë aktivitetet e paligjshme, ndërsa nga ana tjetër bizneset që në dukje janë të ligjshme dhe që i mundësojnë organizatës kriminale të pasurohet edhe më tej”, shpjegon eksperti.

Sipas tij, kjo situatë kishte arritur deri në atë pikë sa Zvicra ishte shndërruar në një lloj strehë të sigurt për familjen kriminale.

Integrim i heshtur në komunitete

Sektorët e restoranteve, ndërtimit dhe pasurive të paluajtshme konsiderohen ndër fushat ku mund të shfaqen rreziqe të pastrimit të parave.

Lepori përmend edhe raste në të cilat automjete luksoze janë marrë me qira apo janë përdorur për të maskuar origjinën e fondeve kriminale.

“Mafia kalabreze ka një aftësi të jashtëzakonshme për t’u integruar në komunitetet lokale”, thekson ai.

Sipas ekspertit, në disa raste, anëtarë të dyshuar të mafies kanë qenë të pranishëm në jetën e komunitetit në mënyra që nuk ngjallnin dyshime. Njëri prej tyre, për shembull, kishte sponsorizuar një ekip futbolli, ndërsa një tjetër kishte punuar si punonjës komunal.

“Është e vështirë ta vëresh”, thotë Lepori.

Strategjia e re kundër krimit të organizuar

Eksperti i referohet edhe strategjisë së re kombëtare kundër krimit të organizuar, të miratuar në dhjetor nga Këshilli Federal i Zvicrës.

Ai e cilëson dokumentin si “të shkëlqyer dhe shumë gjithëpërfshirës”, por shton se mbetet për t’u parë nëse masat e parashikuara do të zbatohen në mënyrë efektive.

“Nëse shoh strategjinë e mëparshme, në të cilën mafia italiane përkufizohej si një kërcënim i konsiderueshëm për vendin tonë, rezultatet ishin të pamjaftueshme”, shprehet ai.

---