Gati 8 milionë franga për fushatat e votimeve federale në Zvicër

Pjesa më e madhe e parave është përqendruar te iniciativa për neutralitetin

Gati 8 milionë franga zvicerane janë deklaruar deri tani për financimin e fushatave lidhur me dy votimet federale që do të mbahen më 27 shtator 2026 në Zvicër.

Pjesa më e madhe e parave është përqendruar te iniciativa për neutralitetin, transmeton albinfo.ch.

Vetëm për iniciativën e neutralitetit janë deklaruar rreth 5.5 milionë CHF. Komiteti në favor të saj ka shpenzuar 3.84 milionë franga, ndërsa ish-figura e njohur e SVP-së, Christoph Blocher, ka kontribuar me rreth 3 milionë franga nga fondet e tij personale. Kundërshtarët e iniciativës kanë mbledhur rreth 1.67 milionë CHF.

Ndërkohë, fushata për iniciativën për sovranitetin ushqimor ka tërhequr edhe 2.35 milionë franga, ku pjesa më e madhe e financimit vjen nga kundërshtarët e saj.

Zyra Federale e Auditimit ka theksuar se këto shifra janë ende paraprake dhe në disa raste mund të përmbajnë deklarime të dyfishta, veçanërisht kur organizata të ndryshme ndajnë fondet mes tyre.

---