Artistët zviceranë kundër uljes së taksave në Vaud: “Kultura do të jetë e para që do të preket”

Më 27 shtator, qytetarët e Vaud-it do të votojnë për një propozim që synon uljen e taksave kantonale me 12 për qind. Artistët paralajmërojnë se masa mund t’i kushtojë buxhetit të kantonit rreth 272 milionë franga në vit.

Qytetarët e kantonit Vaud do të votojnë më 27 shtator për një propozim që synon uljen e taksave kantonale me 12 për qind, me arsyetimin se kjo do të ndihmonte në rikthimin e fuqisë blerëse për shtresën e mesme, transmeton albinfo.ch.

Nisma është kundërshtuar nga një grup artistësh dhe figurash të njohura të kulturës në Zvicër, të cilët janë mobilizuar për të kërkuar votën “jo” në referendum.

Sipas kundërshtarëve të masës, miratimi i uljes së taksave do të nënkuptonte një rënie të të ardhurave të kantonit me rreth 272 milionë franga në vit. Ata frikësohen se mungesa e këtyre të ardhurave do të çojë në shkurtime të buxheteve publike, veçanërisht në sektorin e kulturës.

“Kur në arkën e shtetit hyjnë më pak para, kultura është gjithmonë sektori i parë që përballet me shkurtime buxhetore”, thuhet në argumentet e grupit që kundërshton uljen e taksave.

Artistët theksojnë se kultura nuk duhet të konsiderohet një shpenzim i panevojshëm apo luks, por një pjesë e rëndësishme e jetës publike.

Sipas tyre, kultura është një e mirë publike, nxit kohezionin shoqëror dhe luan rol të rëndësishëm në edukim, ndaj duhet të vazhdojë të mbështetet me fonde publike.

Nëse propozimi do të miratohet, efekti financiar për kantonin do të jetë i ndjeshëm, ndërsa debati pritet të përqendrohet në balancën mes lehtësimit të barrës fiskale për qytetarët dhe ruajtjes së shërbimeve dhe financimit publik. /Albinfo.ch

---