Policia e Neuchâtelit zhvillon takime informuese me azilkërkuesit në Boudry

(KEYSTONE/Christian Beutler)

Policia kantonale e Neuchâtelit ka nisur një iniciativë informuese në Qendrën Federale për Azilkërkues në Boudry, me synimin për t’u prezantuar azilkërkuesve dhe për t’u shpjeguar mënyrën se si funksionojnë policia dhe institucionet zvicerane.

Gjatë takimeve, në të cilat marrin pjesë rreth 30 azilkërkues, përfaqësuesit e policisë shpjegojnë rolin e forcave të rendit, ndarjen e pushteteve dhe mënyrën e funksionimit të sistemit të drejtësisë në Zvicër. Për komunikimin përdoren përkthyes në disa gjuhë, përfshirë kurdishten, farsi dhe rusishten.

Nisma synon gjithashtu të ulë frikën që uniforma e policisë mund të shkaktojë te personat që vijnë nga vende ku policia shpesh perceptohet si kërcënim. Gjatë sesioneve diskutohen tema praktike, si numrat e emergjencës, kontrollet policore, gjobat në transportin publik dhe sjellja në raste të ndryshme që lidhen me ligjin.

Një vëmendje e veçantë i kushtohet edhe dhunës në familje. Policia thekson se dhuna në familje nuk tolerohet në Zvicër dhe se autoritetet mund të ndërhyjnë për të mbrojtur viktimat dhe për të ndaluar dhunën.

Sipas autoriteteve të Neuchâtelit, takimet janë veçanërisht të rëndësishme për gratë, të cilat shpesh kërkojnë informacion mbi të drejtat dhe mundësitë e tyre në Zvicër.

Megjithëse iniciativa është vlerësuar pozitivisht, ajo nuk pritet të shtrihet në nivel kombëtar. Sekretariati Shtetëror për Migracionin (SEM) ka sqaruar se çështjet e sigurisë janë në kompetencë të policive kantonale dhe se ky projekt është një nismë vullnetare e policisë së Neuchâtelit.

Projekte të ngjashme informuese janë zhvilluar edhe në kantone të tjera të Zvicrës, përfshirë Bernën dhe Bazelin.