A është qumështi zviceran i sigurt për konsum?

Një studim i ri ka zbuluar gjurmë të disa substancave kimike të lidhura me gomën në qumështin e papërpunuar në Zvicër, por autoritetet theksojnë se aktualisht nuk ka dëshmi për rrezik të drejtpërdrejtë për shëndetin

Një ekip i Institutit Federal të Teknologjisë në Lozanë (EPFL), në bashkëpunim me Agroscope dhe me mbështetjen e Zyrës Federale për Sigurinë Ushqimore dhe Veterinarinë (BLV), ka analizuar mostra qumështi nga 17 ferma zvicerane. Në shtatë prej tyre u zbulua të paktën një nga katër substancat e lidhura me gomën që po kërkoheshin.

Në tri mostra të marra nga ferma alpine, të vendosura larg rrugëve me trafik të dendur, nuk u gjet asnjë prej substancave të synuara. Megjithatë, studiuesit theksojnë se numri i mostrave është tepër i vogël për të vërtetuar një lidhje të drejtpërdrejtë mes trafikut rrugor dhe pranisë së këtyre kimikateve në qumësht, shkruan The Local, transmeton albinfo.ch.

Një nga zbulimet më interesante lidhet me vetë pajisjet e mjeljes. Në tubat, vulat dhe komponentët e tjerë prej gome të përdorur gjatë prodhimit të qumështit u identifikuan 14 substanca kimike të lidhura me gomën. Kjo ngre mundësinë që një pjesë e tyre të kalojë në qumësht gjatë procesit të prodhimit.

Burim tjetër i mundshëm është konsumimi i gomave të automjeteve dhe sipërfaqeve rrugore. Grimcat e krijuara mund të përhapen përmes ajrit dhe ujit dhe të përfundojnë në tokat bujqësore, duke hyrë potencialisht në zinxhirin ushqimor.

A është qumështi zviceran i sigurt për konsum? Sipas të dhënave të deritanishme, përqendrimet e gjetura në qumësht ishin përgjithësisht të ulëta. BLV thotë se të dhënat aktuale toksikologjike nuk tregojnë rrezik të drejtpërdrejtë për shëndetin, ndërsa efektet e mundshme afatgjata ende nuk janë sqaruar. Për këtë arsye nevojiten studime të tjera dhe vlerësime më të gjera të rrezikut.

Studiuesit synojnë tani të përcaktojnë më saktë se nga vijnë këto substanca, si ndryshojnë përqendrimet gjatë stinëve dhe nëse materialet që përdoren në pajisjet e industrisë ushqimore duhet të përmirësohen.

---