UBS: Cyrihu ka rrezikun më të lartë të flluskës së pasurive të paluajtshme në botë

Çmimet reale të banesave në qytetin zviceran janë rritur me afro 140 për qind në 20 vjet, ndërsa të ardhurat vetëm me rreth 30 për qind.

Cyrihu është qyteti me rrezikun më të lartë të flluskës së pasurive të paluajtshme në mesin e 23 qyteteve të mëdha të analizuara nga UBS në indeksin e saj të ri global, përcjell albinfo.ch.

Sipas Indeksit Global të Flluskës së Pasurive të Paluajtshme të UBS, tregu i banesave në Cyrih është bërë veçanërisht i tensionuar gjatë dy dekadave të fundit, me çmimet e apartamenteve që janë larguar ndjeshëm nga zhvillimi i të ardhurave.

Gjatë 20 viteve të fundit, çmimet reale të banesave në Cyrih janë rritur me pothuajse 140 për qind, ndërsa të ardhurat janë rritur vetëm me rreth 30 për qind.

Një tjetër tregues i përmendur nga UBS është raporti mes çmimit të blerjes dhe qirasë. Në Cyrih, blerja e një apartamenti kushton mesatarisht sa rreth 46 vite qira, shifra më e lartë në mesin e qyteteve të përfshira në analizë.

Zhvillimi tregon se kostoja e pronësisë në Cyrih është shkëputur ndjeshëm nga niveli i qirave dhe të ardhurave, duke e bërë tregun zviceran një nga rastet më të theksuara të analizuara nga UBS.

Indeksi i UBS synon të vlerësojë rrezikun e mbivlerësimit të tregjeve të banesave në qytetet kryesore në mbarë botën, duke marrë parasysh faktorë si çmimet e pronave, të ardhurat, qiratë dhe aktivitetin e tregut. /Albinfo.ch

---