Dëshira për fëmijë në Zvicër mund të kushtojë mijëra franga: çfarë mbulon sigurimi shëndetësor?

Një cikël i fekondimit artificial IVF mund të kushtojë deri në rreth 7 mijë franga, ndërsa me barnat dhe shpenzimet shtesë, fatura mund t’i afrohet ose edhe të kalojë 10 mijë franga

Për çiftet dhe gratë që kanë vështirësi për të pasur fëmijë, trajtimet e fertilitetit në Zvicër mund të kthehen në një barrë të konsiderueshme financiare. Një cikël i fekondimit artificial IVF mund të kushtojë deri në rreth 7 mijë franga, ndërsa me barnat dhe shpenzimet shtesë, fatura mund t’i afrohet ose edhe të kalojë 10 mijë franga.

Çfarë paguan sigurimi bazë?

Sigurimi i detyrueshëm shëndetësor në Zvicër mbulon disa prej hapave të diagnostikimit dhe trajtimit të infertilitetit, por jo të gjitha procedurat.

Në përgjithësi, mbulohen ekzaminimet për përcaktimin e shkaqeve të infertilitetit, si dhe disa trajtime hormonale. Sipas raportimit, stimulimi hormonal i gruas mund të mbulohet deri në 12 cikle ose për një periudhë prej një viti. Gjithashtu mbulohet një numër i kufizuar i inseminimeve, raporton 20 minutes, transmeton albinfo.ch.

Por situata ndryshon kur bëhet fjalë për IVF – fekondimin in vitro. Vetë procedura nuk mbulohet nga sigurimi bazë dhe pacientët duhet ta financojnë atë privatisht. Po ashtu, sigurimi i detyrueshëm nuk paguan diagnostikimin gjenetik para implantimit (PID).

Deri në 7 mijë franga vetëm për një cikël IVF

Një cikël IVF në Zvicër mund të kushtojë deri në 7,000 franga. Barnat mund të shtojnë deri në rreth 2,000 franga, ndërsa ngrirja dhe ruajtja e vezëve, spermës ose embrioneve mund të kushtojë edhe mbi 1,000 franga shtesë.

Kjo do të thotë se vetëm një përpjekje mund të krijojë shpenzime shumë të larta. Nëse nevojiten disa cikle IVF, kostoja totale mund të rritet ndjeshëm.

Gjithnjë e më shumë trajtime jashtë Zvicrës

Kostot dhe kufizimet ligjore po bëjnë që disa persona nga Zvicra të kërkojnë trajtim jashtë vendit. Sipas të dhënave të raportuara, klinika Gynem në Pragë trajtoi 132 paciente nga Zvicra në vitin 2025, krahasuar me 45 në vitin 2020. Klinikat IVI në Spanjë trajtuan mbi 700 paciente nga Zvicra gjatë vitit 2025.

Arsyet nuk lidhen vetëm me çmimet. Në Zvicër ekzistojnë edhe kufizime ligjore për disa forma të riprodhimit të asistuar. Aktualisht, dhurimi i vezëve dhe embrioneve dhe surrogacia janë të ndaluara, ndërsa dhurimi i spermës lejohet vetëm në kushte të përcaktuara ligjore. Autoritetet federale po shqyrtojnë ndryshime në disa prej këtyre rregullave.

Në vitin 2024 në Zvicër u kryen 12,573 cikle IVF, ndërsa rreth 3% e foshnjave në vend lindin pas trajtimeve IVF.

---