Caktohet Paneli i Apelit që do të shqyrtojë ankesat e ish-krerëve të UÇK-së

Paneli do të kryesohet nga gjykatësja franceze Michèle Picard, ndërsa pjesë e tij do të jenë edhe gjyqtarët Kai Ambos nga Gjermania dhe Nina Jørgensen nga Norvegjia.

Është caktuar Paneli i Apelit i Dhomave të Specializuara të Kosovës në Hagë që do të shqyrtojë ankesat në çështjen e ish-krerëve të Ushtrisë Çlirimtare të Kosovës, transmeton albinfo.ch.

Paneli do të kryesohet nga gjykatësja franceze Michèle Picard, ndërsa anëtarë të tij do të jenë gjyqtari gjerman Kai Ambos dhe gjykatësja norvegjeze Nina Jørgensen.

Të tre gjyqtarët kanë përvojë në procedurat gjyqësore ndërkombëtare dhe kanë qenë pjesë edhe e paneleve të mëparshme të Apelit në Dhomat e Specializuara të Kosovës. Ata kanë shqyrtuar, ndër të tjera, çështjet e Hysni Gucatit dhe Nasim Haradinajt, Salih Mustafës dhe Pjetër Shalës.

 

Michèle Picard

Michèle Picard është gjykatëse franceze dhe prej vitit 2013 shërben në Gjykatën e Apelit në Paris. Ajo ka përvojë të gjatë në drejtësinë ndërkombëtare, përfshirë shërbimin si gjykatëse në Tribunalin Penal Ndërkombëtar për ish-Jugosllavinë.

Picard ka pasur gjithashtu angazhime në fushën e të drejtave të njeriut në Kosovë, Bosnjë-Hercegovinë dhe vende të tjera. Ajo ka punuar edhe në projekte të Këshillit të Evropës që lidhen me përafrimin e legjislacionit me standardet evropiane për të drejtat e njeriut.

Në Dhomat e Specializuara të Kosovës, Picard ka kryesuar disa panele të Apelit. Në çështjen e Pjetër Shalës, për shembull, ajo kryesoi panelin që në korrik 2025 shqyrtoi ankesën e mbrojtjes.

 

Kai Ambos

Kai Ambos është profesor i së drejtës penale dhe të drejtës penale ndërkombëtare në Universitetin e Göttingenit në Gjermani. Ai ka një karrierë të gjatë akademike dhe profesionale në fushën e së drejtës penale ndërkombëtare dhe procedurës penale.

Ambos ka punuar si avokat i mbrojtjes dhe konsulent në Tribunalin Penal Ndërkombëtar për ish-Jugosllavinë dhe në Gjykatën Penale Ndërkombëtare. Ai ka shërbyer gjithashtu si gjykatës në Gjykatën Provinciale të Saksonisë së Poshtme dhe në Gjykatën e Apelit të Braunschweigut.

Ai ka qenë pjesë e disa paneleve të Apelit të Dhomave të Specializuara të Kosovës, përfshirë çështjet Gucati–Haradinaj, Salih Mustafa dhe Pjetër Shala.

 

Nina Jørgensen

Nina H. B. Jørgensen është profesore e së drejtës publike ndërkombëtare në Universitetin e Southamptonit në Mbretërinë e Bashkuar.

Ajo ka përvojë të gjerë në drejtësinë penale ndërkombëtare. Gjatë karrierës së saj ka punuar në Gjykatën Speciale për Sierra Leonen, ku ka shërbyer edhe në detyra të larta juridike, si dhe në Dhomat e Jashtëzakonshme të Gjykatës së Kamboxhias.

Jørgensen ka punuar gjithashtu në Tribunalin Penal Ndërkombëtar për ish-Jugosllavinë dhe Tribunalin Penal Ndërkombëtar për Ruandën, ndërsa ka ofruar këshillim juridik edhe për organizata ndërkombëtare.

Edhe ajo ka qenë pjesë e paneleve të Apelit të Dhomave të Specializuara të Kosovës në disa çështje, së bashku me Picard dhe Ambos.

 

Panel me përvojë në çështjet e Dhomave të Specializuara

Përbërja e njëjtë e këtij paneli është përdorur edhe në procedura të mëparshme të Apelit në Hagë. Në çështjen Gucati dhe Haradinaj, paneli shqyrtoi ankesat e të dy të akuzuarve, ndërsa në çështjen Salih Mustafa shqyrtoi ankesën ndaj aktgjykimit të shkallës së parë.

Në rastin e Pjetër Shalës, Paneli i Apelit i përbërë nga Picard, Ambos dhe Jørgensen vendosi në korrik 2025 për ankesën ndaj aktgjykimit dhe uli dënimin e tij nga 18 në 13 vjet burgim.

Paneli i caktuar do të shqyrtojë argumentet e palëve në procedurën e apelit dhe do të vendosë në përputhje me kompetencat që i jep ligji dhe rregullat e procedurës së Dhomave të Specializuara./Albinfo.ch

---