Von der Leyen sot në Tiranë, nesër në Kosovë

Presidentja e Komisionit Evropian nis vizitën e gjashtë vjetore në Ballkanin Perëndimor, me ndalesa në Shqipëri, Kosovë, Mal të Zi dhe Maqedoni të Veriut

Presidentja e Komisionit Evropian, Ursula von der Leyen, nis sot turneun e saj të gjashtë vjetor në Ballkanin Perëndimor, ndërsa të enjten, më 1 tetor, do të qëndrojë në Prishtinë, ku do të takohet me ushtruesen e detyrës së presidentes, Albulena Haxhiu, dhe kryeministrin Albin Kurti, përcjell albinfo.ch.

Turneu do të nisë në Tiranë, ku von der Leyen do të zhvillojë takime me presidentin Bajram Begaj dhe kryeministrin Edi Rama. Më pas, të enjten, ajo do të udhëtojë drejt Prishtinës dhe më vonë gjatë së njëjtës ditë do të vazhdojë vizitën në Podgoricë, ku do të takohet me presidentin Jakov Milatović dhe kryeministrin Milojko Spajić. Vizita do të përfundojë më 2 tetor në Shkup, me takime me presidenten Gordana Siljanovska-Davkova dhe kryeministrin Hristijan Mickoski.

Në fokus të vizitës janë hapat e ardhshëm të vendeve të Ballkanit Perëndimor në rrugën drejt Bashkimit Evropian dhe procesi i integrimit gradual. Komisioni Evropian e lidh këtë proces edhe me Planin e Rritjes për Ballkanin Perëndimor, i cili kap vlerën prej 6 miliardë eurosh.

Gjatë qëndrimit në rajon, presidentja e Komisionit Evropian do të vizitojë edhe projekte të financuara nga BE-ja. Në Prishtinë është planifikuar vizita në objektet e reja të Fakultetit të Matematikës dhe Shkencave të Natyrës, ndërsa në Tiranë do të vizitojë shkollën “Emin Duraku”, të rindërtuar pas dëmeve nga tërmeti i vitit 2019. Në Maqedoninë e Veriut, në fokus do të jetë edhe Korridori VIII hekurudhor.

Në Podgoricë, von der Leyen do të marrë pjesë në përurimin e Qendrës Kombëtare të Koordinimit, një qendër e re operative që synon të forcojë menaxhimin e kufijve të Malit të Zi dhe shkëmbimin e informacionit me vendet anëtare të BE-së dhe Frontex-in. Gjatë turneut janë paraparë edhe konferenca për media, të cilat do të transmetohen nga shërbimi audiovizual i Komisionit Evropian.

Në këtë vizitë nuk janë përfshirë Serbia dhe Bosnjë-Hercegovina. Sipas Komisionit Evropian, von der Leyen synon t’i vizitojë këto dy vende në një fazë të mëvonshme, në kontekstin e zgjedhjeve të ardhshme parlamentare dhe të përgjithshme atje.

Turneu i këtij viti është i gjashti me radhë i von der Leyen në Ballkanin Perëndimor, pas vizitave të saj në rajon në vitet 2021, 2022, 2023, 2024 dhe 2025.
/Albinfo.ch

---