Kurti: Kemi edhe gjashtë ditë për zgjedhjen e presidentit, zgjedhjet e reja mund të shmangen

Përmbledhje e vendimeve të marra në mbledhjen e Qeverisë dhe deklaratave të kryeministrit Albin Kurti në konferencën për media

Kryeministri i Kosovës, Albin Kurti, ka bërë thirrje për arritjen e një marrëveshjeje të re politike për zgjedhjen e presidentit, duke theksuar se institucionet kanë edhe gjashtë ditë kohë për ta shmangur një situatë të re institucionale, përcjell albinfo.ch.

Në mbledhjen e Qeverisë, Kurti tha se marrëveshja e mëparshme ndërmjet Lëvizjes Vetëvendosje dhe LDK-së për zgjedhjen e presidentit është braktisur nga gjashtë deputetë të kësaj partie.

“Aktgjykimi i Kushtetueses, i cili prodhoi një normë të re lidhur me rrjedhjen e afateve për zgjedhjen e presidentit, na vë përpara një situate urgjente për veprim”, tha Kurti.

Ai theksoi se deri më 6 tetor mbetet afati për zgjedhjen e presidentit dhe u bëri thirrje partive politike që të ulen dhe të gjejnë një marrëveshje të re.

“Para nesh po sot kemi edhe 6 ditë të plota për t’i dhënë vendit president ose presidente të re”, deklaroi Kurti, duke shtuar se zgjedhjet e reja, sipas tij, mund të shmangen përmes një marrëveshjeje politike.

Sipas Kushtetutës, nëse presidenti nuk zgjidhet në votimin e tretë, Kuvendi shpërndahet dhe zgjedhjet e reja duhet të mbahen brenda 45 ditësh.

 

Kurti flet edhe për aktgjykimin ndaj ish-krerëve të UÇK-së

Në mbledhje, Kurti foli edhe për aktgjykimin e shkallës së parë ndaj Hashim Thaçit, Kadri Veselit, Jakup Krasniqit dhe Rexhep Selimit në Dhomat e Specializuara të Kosovës.

Ai tha se gjatë vizitës së tij në Shtetet e Bashkuara kishte diskutuar për këtë çështje me zyrtarë dhe përfaqësues të ndryshëm.

Kurti e cilësoi aktgjykimin, sipas vlerësimit të tij, si “të padrejtë juridikisht e moralisht, dhe të pasaktë historikisht e faktikisht”, ndërsa tha se pret që, sipas tij, mangësitë të adresohen në procedurën e apelit.

Ai bëri të ditur gjithashtu se të dielën kishte zhvilluar takime të ndara me kryetarin e PDK-së, Bedri Hamzën, dhe kryetarin e LDK-së, Lumir Abdixhikun.

Sipas Kurtit, në këto takime është diskutuar për veprimet e përbashkëta lidhur me aktgjykimin e 16 shtatorit, si dhe për sfidat institucionale dhe politike.

Kryeministri e cilësoi deklaratën e miratuar nga Kuvendi me 99 vota për si hap të parë të përbashkët dhe kërkoi bashkëpunim ndërmjet subjekteve politike, duke theksuar nevojën për koordinim me ekipet mbrojtëse.

“Si kryeministër do të bëjmë gjithçka që dimë e mundemi bashkë me kolegët nga Qeveria në apel”, tha Kurti.

Kërkesa e Kurtit për një marrëveshje të re për presidentin vjen në një kohë kur partitë politike ende nuk kanë arritur pajtim për kandidaturën, ndërsa PDK-ja ka lidhur diskutimet për presidentin me miratimin e ndryshimeve të propozuara në Ligjin për Dhomat e Specializuara. Kryetari i PDK-së, Bedri Hamza, ka deklaruar se partia e tij është e gatshme të diskutojë për presidentin pas miratimit të këtij projektligji.

 

Kurti deklarohet për ndryshimin e Ligjit për Specialen

Kryeministri Albin Kurti, në një konferencë për media është deklaruar rreth mosprocedimit të Projektligjit për ndryshim/plotësimin e Ligjit për Dhomat e Specializuara të Kosovës.

Para gazetarëve, Kurti tha se brenda javës mund të dalin me një përgjigje për Kuvendin.

“Kemi një iniciativë ligjore nga PDK, kjo është çështje e Kuvendit që i është drejtuar Zyrës ligjore për opinion në Kryeministri. Tash zyra ligjore në Kryeministri, ka kërkuar mendim nga Zyra Ligjore e Ministrisë së Drejtësisë. Gjithashtu edhe nga Departamenti për Buxhet nga Ministria e Financave. Kjo është procedura e rregullt. Prej informacioneve, brenda kësaj jave do ta kemi përgjigjen, si nga… Ministria e Drejtësisë ashtu edhe e Financave, dhe menjëherë do të ia japim përgjigjen Kuvendit”, tha Kurti.

 

Kurti: Serbia e Rusia s’do ta kenë kollaj ta përdorin verdiktin e Speciales kundër Kosovës

Kryeministri i Kosovës, Albin Kurti ka thënë se do të ketë përpjekje nga Serbia dhe Rusia që ta përdorin kundër Kosovës aktvendimin e Dhomave të Specializuara ndaj katër ish-krerëve të Ushtrisë Çlirimtare të Ksoovës, porse një gjë të tillë nuk do ta kenë të lehtë.

Kurti në konferencën për media pas mbledhjes së Qeverisë ka deklaruar se vetë aktgjykimi i Gjykatës Speciale e ka hedhur poshtë të ashtuquajturën “Shtëpia e Verdhë” dhe trafikimin e organeve, si dhe akuzën për krime kundër njerëzimit.

“Duhet ta ndërmarrim një fushatë të përbashkët sa i përket diplomacisë publike sepse natyrisht që do të ketë përpjekje nga Serbia dhe Rusia që aktgjykimi i Dhomave të Specializuara të përdoret kundër Republikës së Kosovës. Ndonëse është e qartë se nuk e kanë kollaj siç kanë menduar për shkak se e para; e ashtuquajtura ‘Shtëpi e Verdhë’ dhe i ashtuaquajturi trafikim i organeve nuk ia arriti as të aktakuza se lëre më te aktgjykimi. Kjo është edhe si rezultat i raportit të Williamsonit ku natyrisht thuhet që s’ka ‘Shtëpi të Verdhë’ e as trafikim të organeve. Çka ka ndodhë në atë aktgjykim në kontrast me raportin Clint Williamsonit është edhe fakti që aktgjykimi ka thënë se nuk ka pasur krime kundër njerëzimit e as dhunë, përndjekje sistematike e të gjerë ndaj popullsisë civile. Pra UÇK-ja ska bërë diçka të tillë”, ka thënë Kurti.

Gjykata Speciale ka dënuar me nga 25 vjet burgim Hashim Thaçin e Jakup Krasniqin, me 18 vjet burgim Kadri Veselin dhe me 13 Rexhep Selimin. Ish-udhëheqësit e Ushtrisë Çlirimtare të Kosovës u dënuan për krime lufte, përfshirë ndalim të paligjshëm ose arbitrar, trajtim mizor, torturë dhe vrasje të paligjshme.

Kundër këtij vendimi janë mbajtur protesta gjithandej nëpër botë nga shqiptarët, e në Prishtinë çdo ditë.

 

Kurti: Asnjëherë s’kam pritur drejtësi nga Specialja, këtë javë i përgjigjemi iniciativës së PDK-së

Kryeministri Albin Kurti ka thënë se asnjëherë s’ka pritur drejtësi nga Gjykata Speciale, ndërsa ka shtuar se këtë javë do t’i përgjigjen iniciativës së Partisë Demokratike të Kosovës (PDK) e cila kërkuar ndryshimin në Ligjin për Dhomat e Specializuara.

PDK-ja ka dorëzuar në Kuvend dhe Qeveri propozimet për ndryshim të këtij ligji, duke synuar që çështjet që nuk lidhen me akuzat për trafikim organesh, të barten në Kosovë, për shkallët e tjera të gjykimit. Inicimi u bë pas dënimit nga Specialja me 81 vjet burgim për katër udhëheqës të Ushtrisë Çlirimtare të Kosovës.

Në një konferencë për media pas mbledhjes së Qeverisë të mërkurën, Kurti ka thënë se iniciativën e PDK-së e kanë dërguar në zyrën ligjore të Ministrisë së Drejtësisë dhe Ministrisë së Financave. 

“Është procedurë e rregullt. Nuk duam të bëjmë shkelje, s’kemi pse. Prej informimeve që i kam deri më tani, edhe nga ministritë, këtë javë do ta kemi përgjigjen edhe si mendim të zyrës ligjore të Ministrisë së Drejtësisë, po ashtu edhe vlerësimin financiar të buxhetit nga Ministria e Financave e menjëherë do ta përcjellim për Kuvend”, ka thënë ai. 

 

---