Zviceranët nuk duan taksë për produktet me sheqer

Foto ilustrim: @unsplash

Qytetarët zviceranë kërkojnë një rol më aktiv të shtetit në luftën kundër obezitetit, por nuk mbështesin vendosjen e taksave të reja apo ndalimeve për produktet me sheqer, kripë dhe yndyrë.

Sipas një sondazhi të realizuar me porosi të Soft Drinks Information Group, shumica e qytetarëve zviceranë favorizojnë përgjegjësinë individuale, ndërsa kërkojnë masa më të forta për mbrojtjen e fëmijëve nga reklamat e produkteve të pashëndetshme.

Sondazhi, i realizuar nga instituti gfs.Bern me më shumë se 1,000 persona gjatë periudhës mars-maj, tregon se rreth 68% e të anketuarve kundërshtojnë vendosjen e një takse mbi ushqimet që përmbajnë sheqer, kripë ose yndyrë.

Ndër arsyet kryesore të kundërshtimit është bindja se një taksë e tillë do të rëndonte më shumë mbi personat me të ardhura të ulëta dhe nuk do të sillte ndryshime të rëndësishme në zakonet ushqimore.

Edhe ideja për taksimin e këtyre produkteve me qëllim financimin e fushatave informuese për shëndetin publik nuk gjen mbështetjen e shumicës. Vetëm 45% e të anketuarve e mbështesin këtë masë.

Ndërsa propozimi më pak i popullarizuar është vendosja e një moshe minimale për blerjen e produkteve me sheqer, i cili mbështetet vetëm nga 19% e të anketuarve.

Shumica kërkon masa më të forta kundër obezitetit

Pavarësisht kundërshtimit ndaj taksave dhe ndalimeve, 76% e të anketuarve konsiderojnë të pamjaftueshme masat e marra deri tani për parandalimin e obezitetit.

Rreth 90% mbështesin programet parandaluese për grupet në rrezik, si dhe nismat e përbashkëta mes shtetit dhe sektorit privat.

Po ashtu, 89% e të anketuarve janë në favor të mësimit të detyrueshëm të parimeve të ushqyerjes së shëndetshme në shkolla.

Një tjetër masë që gëzon mbështetje të gjerë është ndalimi i reklamimit të produkteve që përmbajnë sheqer, kripë ose yndyrë për fëmijët nën moshën 13 vjeç. Këtë propozim e mbështesin 82% e të anketuarve.

Në këtë kuadër, prodhuesit e ushqimeve po bashkëpunojnë me qeverinë zvicerane për hartimin e një plani vullnetar masash për adresimin e problemit të obezitetit.

Sondazhi është porositur nga Soft Drinks Information Group, një organizatë e themeluar në vitin 2013 nga prodhues të sektorit të pijeve, ku marrin pjesë edhe përfaqësues nga bota e politikës dhe biznesit.